एजेन्सी – रेडबुल साल्जवर्ग अष्ट्रियन कपको च्याम्पियन बनेको छ । शुक्रबार राति भएको खेलमा साल्जवर्गले एससी अष्ट्रिया लुस्टेनोउमाथि ५–० को जित निकाल्दै लगातार अष्ट्रियन कपको च्याम्पियन बनेको हो । 

जर्मन क्लब बोरुसिया डर्टमुन्डका स्टार फरवार्ड एर्लिङ ब्राउट हालान्डको पुर्व क्लब रेडुबल साल्जवर्ग गतवर्ष पनि च्याम्पियन बनेको थियो । ओथर्सी स्टेडियम क्लागेनफर्टमा भएको खेलमा साल्जवर्गको जितमा डोमिनिक सावोजलाई, नोआ ओकाफर, माजित एसेमेरु र सिकोउ कोइटाले गोल गर्दा डोमिनिक स्टुमवर्गरले आत्मघाती गोल गरेका थिए । पहिलो हाफमा ३ गोल सम्भव हुदा दोस्रो हाफमा दुई गोल भएको थियो ।

लगातार च्याम्पियन बन्दा यसपटक साल्जवर्गले कोरोना महामारीको त्रासका कारण आफ्ना प्रशंसकसँग च्याम्पियन ट्रफीको खुशीयाली मनाउन पाएन । मैदानमा विपक्षी टोलीसँग ९० मिनेट निकट रहेर प्रतिस्पर्धा गरेपनि च्याम्पियन बनेपछि साल्जवर्गले च्याम्पियन ट्रफी उचाल्दा सामाजिक दुरी कायम गरेका थिए । पुरस्कार वितरण समारोह पनि सामाजिक दुरी अपनाएर गरिएको थियो । कप्तान एन्ड्रियास उल्मरले टोलीको नेतृत्व गदैं ट्रफी उचाल्दा अन्य सहकर्मीले उनलाई साथ दिएका थिए ।

साल्जवर्गले सामाजिक दुरी अपनाएर च्याम्पियनको खुशीयाली मनाइरहँदा बन्द रंगशालामा यो दृश्य निकै अनौठो देखिएको थियो । यो असामान्य जस्तै लाग्ने उत्सव अन्य लिग विजेताहरुका लागि खाका हुन सक्दछ । इंग्लिस क्लब लिभरपुल ३० वर्षपछि प्रिमियर लिगको च्याम्पियन बन्ने संघारमा रहँदा लिभरपुलले यस्तै असाधारण र सामाजिक दुरी कायम गरी च्याम्पियन ट्रफी उचाल्नुपर्ने हुन्छ ।