एजेन्सी – युरोपियन फुटबलको सर्वाेच्च निकाय (युइएफए) ले युइएफए च्याम्पियन्स लिगको सेमिफाइनल र फाइनल खेल टर्कीको इस्तानबुलबाट सार्ने योजना बनाएको छ ।

युइएफएले टर्की शहरले समर्थकविनाको च्याम्पियन्स लिगका खेलहरु गर्न निकै संघर्ष गर्नुपर्ने देखिएका कारण सार्ने तयारी गरिरहेको हो । १७ जुनमा बस्ने युइएफएको बोर्ड मिटिङले च्याम्पियन्स लिगको बाँकी खेल र एक भेन्युको बारेका निर्णय गर्न सक्नेछ । च्याम्पियन्स लिग अगस्टमा सकाउने योजना छ ।

यसअघि च्याम्पियन्स लिगको फाइनल ३० मेलाई तय थियो । तर, कोरोना कहरका कारण यो सबै स्थगित अवस्थामा छ । रिपोर्ट अनुसार युइएफए र आयोजक शहरबीच यस विषयमा छलफल भइरहेको छ । आयोजक शहरले फ्यानविना आफ्नो लगानी उठाउन नसक्ने र हवाई यात्रासम्वन्धी पनि झन्झट बेहोर्नुपर्ने छ ।

यस्तै सबै बाँकी रहेका खेलहरु एकै भेन्युमा गराउदा आयोजक शहरलाई आर्थिक हिसावले थप घाटा हुन सक्ने देखिएको छ । जर्मनी र पोर्चुगलको लिस्वन शहर फ्यानविना युइएफएको बाँकी रहेको खेलहरु गराउन सक्षम रहेको र आयोजनाका लागि तयार रहने बताएका छन् । युरोप लिगको हकमा पनि च्याम्पियन्स लिगकै पद्दतिमा प्रस्ताव अगाडी सारिएको छ ।

तर, युइएफएले क्वाटरफाइनलदेखि डबल लेग (होम एन्ड अवे) नखेलाउने योजना अघि सारेको छ । सेमिफाइनल र फाइनल खेलका लागि पनि फाइनल फोर अर्थात् चार टोलीको एकै मैदानमा चार दिनको अन्तरमा खेल गराउने योजना युइएफएको योजना छ ।

त्यसअघि युइएफएले प्रि–क्वाटरफाइनलका बाँकी खेल र क्वाटरफाइनलका सबै खेल ‘न्युट्रल भेन्यु’ मा खेलाउन सक्नेछ । युइएफएले अगस्टको पहिलो साता प्रि–क्वाटरफाइनलका बाँकी खेल गराउने योजना अघि सारिसकेको छ ।

स्पेनिस एट्लेटिको मड्रिड, फ्रेन्च क्लब पेरिस सेन्ट जर्मेन (पीएसजी), इटालियन क्लब एटलान्टा र जर्मन क्लब आरबी लाइप्जिगले च्याम्पियन्स लिगको क्वाटरफाइनलमा स्थान बनाएका छन् । क्वाटरफाइनल पुग्न राउन्ड अफ १६ को दोस्रो लेगमा इंग्लिस क्लब म्यानचेस्टर सिटीले स्पेनिस क्लब रियल म्याड्रिड, इटालियन क्लब युभेन्टसले फ्रेन्च क्लब लियोन, स्पेनिस क्लब बार्सिलोनाले इटालियन क्लब नपोली र जर्मन क्लब बायर्न म्युनिखले इंग्लिस क्लब चेल्सीसँग खेल्न बाँकी छ ।