एजेन्सी – कोरोना महामारीका कारण मार्च दोस्रो सातादेखि स्थगित इटालियन सिरी ‘ए’ २० जुनदेखि सुचारु हुने भएको छ । इटलीका खेलकुद मन्त्री भिन्सेन्जो स्पाडाफोराले सिरी ‘ए’ जुन २० देखि शुरु हुने जानकारी गराएको हो ।

देशव्यापी लकडाउनका कारण सिरी ‘ए’ मार्च ९ देखि स्थगित भएको थियो । सिरी ‘ए’ क्लबहरुले विगत एक महनिादेखि नै प्रशिक्षण शुरु गरिसकेको छ । इटली सरकारले जुन १४ सम्म खेलकुदका कुनै गतिविधि नगर्न निर्देशन दिएपछि इटली फुटबल फेडेरेसन (एफआइजिसी) ले जुन दोस्रो सातादेखि सिरी ए सुचारु गर्ने योजना बनाएपनि धक्का लागेको थियो ।

इटलीका प्रधानमन्त्री गुइसेप्पे कोन्टेले १४ जुनसम्म खेलकुदका कुनै गतिविधि नगर्न निर्देशन दिएका थिए । खेलकुद मन्त्री स्पाडाफोराले बिहीबार तीन सातापछि सिरी ‘ए’ सुरु हुने मिति निर्धारण गरेपछि सिरी ए लाई अझै एकहप्ता बढी कुर्नुपर्ने भएको छ । मार्च ९ देखि स्थगित सिरी ‘ए’ सुचारु हुने सम्भावना छ । तर, त्यो भन्दा एक हप्ता अघि इटालियन कप शुरु हुन सक्ने खेलकुद मन्त्री स्पाडोफोराले जानकारी गराएका छन् । खेलकुद मन्त्री स्पाडोफोराले एफआइजिसी, खेलाडी संघ र सिरी ए लिगका प्रतिनिधिसँगको छलफलपछि यो निर्णय भएको घोषणा गरेका हुन् ।

‘हामी भन्न सक्छौं । सिरी ए २० जुनदेखि शुरु हुन सक्छ । त्यसअघि इटलियन कपको सेमिफाइनल १३ जुनमा र फाइनल १७ जुनमा हुन सक्नेछ ।’ खेलकुद मन्त्री स्पाडोफोराले भने । बिहीबार नै इंग्लिस प्रिमियर लिग १७ जुनबाट सुचारु हुने घोषणा भएको थियो ।

सिरी ‘ए’ मा अझै १२ राउन्डको खेल बाँकी छ । २५औं चरणको खेल जारी रहँदा सिरी ‘ए’ स्थगित हुन पुगेको थियो । युभेन्टस ६३ अंक जोडेर शीर्षस्थानमा रहँदा लाजियोलाई ६२ अंक जोडेर युभेन्टसलाई पछ्याइरहेको छ ।