एजेन्सी – स्पेनिस क्लव रियल म्याड्रिडले फ्रान्स तथा इंग्लिस क्लब म्यानचेस्टर युनाइटेडका मिडफिल्डर पउल पोग्बा अनुबन्धको लागि युनाइटेडसमक्ष आफ्ना टोलीका चार खेलाडी दिने प्रस्ताव गरेको छ । 

रियल यसपटक पोग्बा लागि केही पछि हटेको अनुमान गरिएपनि यो प्रस्तावसँगै रियल र प्रशिक्षक जिनेदिन जिदान अझै पनि उनको अनुबन्धको दौडमा रहेको बुझ्न सकिन्छ । जिदानले यसअघि पनि पोग्बा अनुबन्धको लागि लगातार प्रयास गरेपनि विफल भएको थियो । २७ बर्षे पोग्बाले युनाइटेड छाड्ने योजना बनाइरहेका छन् । उनी पछिल्लो समय आफ्नो पूर्व क्लब युभेन्टससँग नजिकिएको चर्चा पनि चलेको छ ।

रियलले युनाइटेडलै प्रस्ताव गर्ने सुचीमा हामेस रोड्रिग्वेज, मार्टिन ओडेगार्ड, लुकास भास्क्वेज र ब्राहिम डियाज छन् । पछिल्लो समय चोटसँग जुधिरहेका पोग्बाले यो सिजन युनाइटेडका लागि ८ खेलमा गोल गर्न सकेका छैनन् । युनाइटेडका प्रशिक्षक ओले गनर सोल्सायरले भने पोग्बा नबेच्ने बताउँदै आएका छन् ।

प्रशिक्षक सोल्सायरले पोग्वालाई गत जनवरीमा क्लबमा अनुबन्ध भएका पोर्चुगिज ब्रुनो फर्नान्डेजसँगै खेलाउने योजना बनाएका छन् । ब्रुनोको आगमनसँगै युनाइटेडले प्रदर्शन सुधार गर्दै आएको छ । पोग्बा घाइते भएका कारण यी दुईले सँगै खेल्न भने पाएका छैनन् ।

यता कोलोम्बियाका मिडफिल्डर रोड्रिग्वेज पनि क्लब छाड्ने तयारीमा छन् । उनी २०१४ मा फ्रेन्च क्लब मोनाकोबाट रियलमा अनुबन्धित भएका थिए । ब्राजिलमा भएको विश्वकपमा उच्च प्रदर्शन गरेपछि रियलले रोड्रिग्वेजलाई क्लबमा अनुबन्ध गरेको थियो । तर, रियलमा सोचेजस्तो प्रदर्शन गर्न नसकेपछि उनी २०१७ देखि २०१९ सम्म लोनमा जर्मन क्लब बायर्न म्युनिख पुगेका थिए ।

यस्तै ओडेगार्डलाई रियलले १६ वर्षको उमेरमा २०१५ मा नर्वेजियन क्लब स्ट्रोम्सगोडसेटबाट रियलमा अनुबन्ध गरेका थिए । रियलको पहिलो रोजाईमा अवसर नपाएका उनले एससी हिरेनभिन र भिटेसे आर्न्हम हुँदै अहिले रियल सोसिडाडबाट लोनमा खेलिरहेका छन् । ओडेगार्डले उच्च प्रदर्शन गरिरहे पनि पोग्बा अनुबन्धन हुने देखिएमा रियलले उनलाई बेच्न सक्नेछ ।

अर्का खेलाडी लुकास भाज्केज रियलको एकेडेमीमा हुर्किएका खेलाडी हुन् । उनले वैकल्पिक खेलाडीका रुपमा मात्र अवसर पाएकाले जिदानको योजनामा नरहेको प्रष्ट छ । ब्राहिम डियाज गत जनवरीमा इंग्लिस क्लब म्यानचेस्टर सिटीबाट अनुबन्ध गरेका थिए । तर उनले सोचेअनुरुप छाप बसाउन सकेनन् ।