एजेन्सी – जर्मन टोली बोरुसिया डर्टमुन्डका युवा फरवार्ड एर्लीङ ब्राउट हालान्ड मंगलबार बायर्न म्युनिखविरुद्ध खेलमा घाइते भएका छन् । उनको चोटले डर्टमुन्डलाई आक्रमणमा समस्या पर्ने भएको छ ।

जनवरीमा अष्ट्रियन क्लब साल्जबर्गबाट जर्मनी आएका हालान्डले उत्कृष्ट सुरुवात गरेका थिए । मंगलबार उपाधि होडमा रहेका शीर्ष दुई टोलीको खेलमा भने हालान्डले गोल गर्न सकेनन् । यद्यपि उनले पहिलो हाफमा गोल गर्ने केहि सुन्दर अवसर भने पाएका थिए ।

दोस्रो हाफको ७२ औं मिनेटमा मिडफिल्डर जेडन सान्चोको क्रस भेट्ने प्रयासमा हालान्डले घुँडामा चोट बोकेका थिए । उनको चोट कस्तो रहेको भन्ने यकिन नभएको टोलीका प्रशिक्षक लुसियन फाभ्रले बताएका छन् । ‘म अहिले नै चोट कस्तो छ भन्ने अवस्थामा छैन । घुँडामा चोट लागेको हो, तर कति गम्भीर चोट हो भन्ने परिक्षण गरेपछि थाहा हुन्छ,’ उनले भने ।

हालान्डले डर्टमुन्डका लागि लिगका ८ खेलमा सुरुवात गर्दै १० गोल गरेका छन् । उनी ३ खेलमा वैकल्पिक खेलाडीका रुपमा मैदान प्रवेश गरेका थिए । हालान्डले सबै प्रतियोगितामा डर्टमुन्डका लागि १३ गोल गरिसकेका छन् । बायर्नविरुद्ध पहिलो हाफमा केहि अवसर चुकाएका उनले दोस्रो हाफमा भने त्यहि लयमा खेल्न सकेनन् । खेलमा बायर्नले १-० को जित दर्ता गर्दै शीर्षस्थानमा ७ अंकको अग्रता बनाएको छ ।

हालान्डको चोट गम्भीर भएमा डर्टमुन्डलाई आक्रमणमा समस्या पर्ने निश्चित छ । चोटका कारण जेडन सान्चो पनि सुरुवाती ११ मा पर्न नसक्दा जुलियन ब्रान्ट र थोर्गन हाजार्डमा आक्रमणको दारोमदार आउनेछ । स्पेनिस फरवार्ड पाको अल्कासेर र जर्मन फरवार्ड मार्को रिउसमाथि पनि जिम्मेवारी थप हुनेछ ।