एजेन्सी – पोर्चुगिज सुपरस्टार क्रिस्टियानो रोनाल्डो एक सातादेखि युभेन्टसको प्रशिक्षणमा सामेल भइसकेका छन् । तर, रोनाल्डोले अझै पनि टिमसँगको प्रशिक्षण समावेश हुन पाएका छैनन् । 

युभेन्टसले प्रशिक्षण शुरु गर्ने भएपछि पोर्चुगलको मडेरियाबाट इटली फर्किएका रोनाल्डोले दुई साता क्वारेन्टिनमा बिताएका थिए । यसबीचमा रोनाल्डोले दुई साता युभेन्टसको प्रशिक्षण छुटाएका थिए । क्वारेन्टिनमा रहँदा पनि रोनाल्डोले आफुलाई फिट राख्ने प्रयास गरिरहेका थिए ।

दुई साताको प्रशिक्षण छुटेका कारण रोनाल्डोले हालसम्म टिमसँग सामुहिक प्रशिक्षण गर्न पाएका छैनन् । तर, रोनाल्डोले एकल प्रशिक्षण गर्दै आफुलाई फिट राख्नको लागि बलसहित प्रशिक्षण र त्यसपछिको समयमा पनि छुट्टै प्रशिक्षण पनि गरिरहेका छन् ।

क्वारेन्टिनमा रहँदा ३५ वर्षीय रोनाल्डोको कोरोना परिक्षण गर्दा रिपोर्ट नेगेटिभ आएपछि उनले एक साता अघिदेखि प्रशिक्षणमा सामेल हुन पाएका थिए । रोनाल्डोले गतसाता प्रशिक्षणमा फर्किएपछि तस्विरसँगै ‘जब हामी धैर्यता र स्थिर बन्छौं, हामीले कठिनाईहरु पार गर्ने उपाय भेट्टायौं ।’ भनी पोस्ट गरेका थिए ।

मौरिसिया सार्रीको प्रशिक्षणमा युभेन्टसले सोमबारदेखि सामूहिक प्रशिक्षण शुरु गरिसकेका छन् । रोनाल्डो केही दिनपछि सामुहिक प्रशिक्षणमा जोडिने प्रशिक्षक सार्रीले बताएका छन् । तर, क्लबले रोनाल्डोले माइकल जोर्डन शैलीमा प्रशिक्षण गरिरहेको भिडियो शेयर गर्दै क्याप्सन ‘सहज रुपमा लिउ क्रिस्टियानो’ लेखेको थियो ।

कोरोना महामारीका कारण सिरी ‘ए’ गएको मार्च देखि स्थगित छ । इटालियन फुटबल फेडेरेसनले जुनको दोस्रो या तेस्रो सातादेखि सिरी ‘ए’ सुचारु गर्ने तयारी गरिरहेको छ । सिरी ‘ए’ को ११ चरणको खेल बाँकी रहँदा युभेन्टस ६३ अंक जोडेर शीर्षस्थानमा रहेको छ । लाजियोले ६२ अंक जोडेर युभेन्टसलाई पछ्याइरहेको छ ।