एजेन्सी – कोरोना त्रासकाबीच दुई महिनापछि १६ मेदेखि सुरु भएको जर्मन बुन्डेसलिगा । उपाधि होडमा रहेका टोलीबाट दुवै खेलमा शत प्रतिशत नतिजा । यो उपाधि होडमा रहेका बायर्न म्युनिख र बोरुसिया डर्टमुन्डको नतिजा हो । 

कोरोनापछिको दुई चरणको खेलमा डर्टमुन्डले पछिल्लो दुई खेलमा साल्केमाथि ४–० ले तथा वल्फ्सबर्गमाथि २–० को जित निकालेको थियो । बायर्नले युनियन बर्लिनमाथि २–० को तथा फ्रान्फर्टमाथि ५–२ को जित निकालेको थियो ।

कोरोनापछि यही अपराजित दुई टोली मंगलबार राति आमनेसमाने हुदैछन् । खेल डर्टमुन्डको घरेलु मैदान सिग्नल इडुना पार्कमा नेपाली समयअनुसार राति १०ः१५ बजेपछि शुरु हुनेछ । यो खेललाई जर्मनको ‘डेल क्लासिकेर’ को नामले अर्थात जर्मन क्लासिकोको रुपमा पनि लिइन्छ । अझ अहिले यो खेललाई हालान्ड भर्सेस लेवान्डोस्कीको रुपमा पनि चित्रण गर्न थालिएको छ ।

उपाधि होडमा रहेको बायर्न र डर्टमुन्ड दुवैलाई यो खेल उत्तिकै महत्वपुर्ण छ । अर्थात दुवैलाई जित आवश्यक छ । सम्भवतः यही खेलले नै जर्मन बुन्डेस लिगाको यो सिजनको उपाधि छिनोफानो गर्न सक्नेछ । डर्टमन्डविरुद्ध जित निकाल्न सके बायर्नले ७ अंकको स्पष्ट अग्रता बनाउनेछ । बराबरीले ४ अंककै तथा हारले अंक दुरी १ मा छोट्टिनेछ ।

यता, घरेलु टोली डर्टमुन्ड बायर्नलाई पराजित गर्दै अंक दुरी छोट्याएर उपाधि होडमै उभिन चहान्छ । बराबरीले झिनो सम्भावना रहँदा हारले डर्टमन्डको उपाधि यात्रा लगभग सकिनेछ । बायर्नको २७ खेलबाट ६१ तथा डर्टमन्डको ५८ अंक छ । बायर्नलाई यसपटक डर्टमुन्डको मैदानमा उत्रदा केही फाइदा हुन सक्नेछ । जर्मनीको सबैभन्दा बिशाल दर्शक रहने इडुना पार्क शान्त रहनेछ । डर्टमण्डका लागि घरेलु माहौल नै शुन्य रहनेछ ।

डर्टमुन्डले पछिल्ला ५ मध्ये एक खेल मात्रै गुमाएका छन् । डर्टमन्डले पछिल्लोपटक च्याम्पियन्स लिगको प्रि–क्वाटरफाइनलको दोस्रो लेगमा पीएसजीसँग २–० को हार बेहोरेको थियो । यता, बायर्न पछिल्लो ८ खेलमा अपराजित छ ।

हालान्ड भर्सेस लेवान्डोस्की

मंगलबार राति बायर्न र डर्टमुन्डको खेलमा डर्टमुन्डका हालान्ड र बायर्नका लेवान्डोस्की नै सवैको नजरमा पर्नेछ । किन कि यि दुई खेलाडी कठिन अवस्थामा गोल गर्न निकै माहिर छन् । बुन्डेस लिगाका सर्वाधिक गोलकर्ता (२७) रहेका लेवान्डोस्कीलेयो सिजन ३५ खेलमा (४१) गोल गरेका छन् । लेवान्डोस्कीले डर्टमन्डविरुद्धको पछिल्लो ६ खेलमा १२ गोल गरेका छन् ।

यता, हालान्डले पनि यो सिजन ३५ खेलमै ४१ गोल गरेका छन् । जनवरीसम्म थोरै मात्र नाम सुनिएका १९ वर्षीय हालान्ड डर्टमुन्ड आएयता नै उनको चर्चाको शिखर चुलिएको हो । उनले डर्टमुन्डमा आएर बुन्डेस लिगामा १० खेलमा १० गोल गर्दा डर्टमन्डका लागि १३ खेलमा १३ गोल गरेका छन् । हालान्डले यो सिजन अष्ट्रियन क्लब रेडबुल साल्जवर्गका लागि २८ गोल गरेका थिए ।

हेड टु हेड

पछिल्लो तथ्यांक अनुसार यि दुई टोली ३३ पटक आमने समाने भएका छन् । जसमा बायर्न नै हावी देखिएको छ । बायर्नले १५ खेलमा जित हात पार्दा ६ बराबरी र १२ हारको नतिजा निकालेको छ । पछिल्लो चार खेलको नतिजा हेर्दा यि दुई टोलीले समान दुई जित निकालेका छन् ।  यस सिजनको पहिलो खेलमा बायर्नले घरेलु मैदानमा डर्टमण्डलाई ४–० ले हराएको थियो ।

गत सिजन बायर्नको मैदानमा भएको खेलमा पनि घरेलु टोली ५–० ले विजयी भएको थियो । पछिल्लो दुई खेलमा कुनै गोल नखाई नगरी ९ गोल गरेको डर्टमुन्डलाई यसपटक घरेलु मैदानमा बदला लिने अवसर समेत छ । गत सिजन घरेलु मैदान सिग्नल इडुना पार्कमा भएको खेलमा डर्टमुन्डले बायर्नलाई ३–२ ले पराजित गरेको थियो । घरेलु मैदानमा बायर्नसँग खेलेको पछिल्लो चार खेलमा डर्टमुन्डले एक खेल मात्र हारेको छ ।

खेल हुने स्थानः सिग्नल इडुना पार्क, डर्टमुन्ड

खेल हुने समयः राति १०ः१५ बजे