एजेन्सी – विश्व फुटबलको सर्वाेच्च निकाय (फिफा) ले हेइटी फुटबल फेडेरेसन (एफएचएफ) का अध्यक्ष यवेश जिन बार्टलाई ९० दिनको निलम्बन सुनाएको छ । यौन दुर्व्यवहार आरोप लागेपछि फिफाले उनलाई ९० दिनको निलम्बन कारवाही गरेको हो ।

पछिल्लो रिपोर्ट अनुसार अध्यक्ष जिन बार्टले राष्ट्रिय प्रशिक्षण केन्द्रमा प्रशिक्षण गरिरहने महिला फुटबलरहरुलाई यौन दुर्व्यवहारको प्रयास गरेको र यो सुचनालाई बाहिर ल्याएमा ज्यान मार्ने धम्की दिएको समेत बाहिरिएको छ । जुन विषयमा अहिले अनुसन्धान भइरहेको छ । यो घट्ना गत अप्रिलमा बाहिरिएको थियो ।

बार्टले ५ वर्षअघि बाटै एफएचएफको ट्रेनिङ सेन्टर क्रोस डेस बुउकेट्समा महिला खेलाडीलाई यौन दुर्व्यवहारको प्रयास गरेको आरोप लागेको छ । तर, यो आरोपलाई अध्यक्ष बार्टले अस्वीकर गर्दै आइरहेका छन् ।  फिफाको आचार संहिताको धारा ८४ र ८५ बमोजिम उनलाई ९० दिनसम्म फुटबलको गतिविधिमा प्रतिबन्ध लगाएको फिफाले जारी गरेको विज्ञप्तिमा उल्लेख छ । यो विषयमा थप अनुसन्धान भइरहेको फिफाले जनाएको छ ।

अध्यक्ष जिन बार्टविरुद्ध पीडित, उनका साथीहरु र परिवारका सदस्यहरुले राष्ट्रिय टोलीको विभिन्न कार्यक्रम र प्रतियोगिताहरुमा लगेर यौन सम्वन्धको लागि प्रयास गर्ने गरेको आरोप लगाएका छन् । तर, यो आरोपलाई बार्टले भने अस्वीकार गर्दै आइरहेका छन् । सोमबार यो विषयमा सुनुवाई भइरहँदा पीडित पक्ष सडकमा प्रदर्शनमा उनीविरुद्ध नाराबाजीमा उत्रिएका थिए ।

७२ वर्षीय बार्ट २०१६ मा हेइटी फुटबल संघको अध्यक्षमा पुनः निर्वाचित भएका थिए । उनी त्यसअघि २०१२ मा हेइटी फुटबल संघका अध्यक्षमा निर्वाचित भएका थिए ।