एजेन्सी – स्वीडिस तथा इटालियन क्लब एसी मिलानका भेट्रान फरवार्ड ज्लाटन इब्राहिमोभिचले अभ्यास दौरान गम्भीर चोट बोकेका छन् । सोमबार प्रशिक्षण दौरान ज्लाटनले एकिलिसमा (कुर्कुच्चाको माथिल्लो भाग) चोट बोकेका हुन् ।

इब्राहिमोभिच गत जनवरीमा यसै समरसम्मको लागि अमेरिकी मेजर लिग सकर क्लब एलए ग्यालेक्सीबाट मिलान पुगेका थिए । तर, रिपोर्ट अनुसार ज्लाटनको यो चोटले उनको खेल करियर नै खतरामा पर्ने सम्भावना रहेको छ । मार्काका अनुसार म्यानचेस्टर युनाइटेडका पुर्व फरवार्ड इब्राको एकिलिस टेन्डन फुटेको र उनी लामो समय मैदान बाहिर हुन सक्ने दावी गरेको छ ।

मार्कालाई उल्लेख गर्दै स्पोर्ट्स मिडियाका पिट्रो बाल्जा प्रोटाले ट्वीटरमा लेखेका छन्  ‘ज्लाटन इब्राहिमोभिचका लागि नराम्रो चोट, मेडिकल टेस्ट अपेक्षित छ तर, यो लामो विश्राम हुन सक्छ ।’

क्लबले भने मंगलबार हुने परिक्षणपछि धेरै कुरा बाहिर आउने बताएको छ । ‘हामी समस्याको मुख्य कुरा जान्नेछौ ।’ क्लबको विज्ञप्तिमा उल्लेख छ ।

ज्लाटनले जनवरी यता १० खेलमा ४ गोल गरिसकेका छन् । सिरी ‘ए’ सुचारु हुने अवस्था पाएपछि क्लबहरुले दुई साता अघिदेखि प्रशिक्षण थाल्दा ज्लाटनले पनि इटली फर्कदै क्वारेन्टिन अवधि पुरा गरेर टोलीको प्रशिक्षणमा जोडिएका थिए । १९ मे बाट समुहगत रुपमा प्रशिक्षण गर्न अनुमति पाइसकेका छन् ।

इटाली सरकारले बिहिबार सिरि ‘ए’ फुटबल सुरु हुने सम्भावित मिति घोषणा गर्नेछ । गएको मार्चदेखि स्थगित सिरी ‘ए’ १३ जुनबाट सुचारु हुन सक्ने आँकलन गरिएको छ । इटालियन फुटबल महासंघले २० अगष्टभित्र यो सिजनको सबै खेल सक्ने योजना राखेको छ । नयाँ सिजन सेप्टेम्बर १ बाट सुरु गर्ने तालिका तय गरेको छ ।

युभेन्ट्स ६३ अंक जोडेर सिरी ‘ए’ को शीर्षस्थानमा छ । ६२ अंक जोडेर लाजियोले युभेन्टसलाई पछ्याइरहेको छ । एसी मिलान ३६ अंक जोडेर सातौ स्थानमा छ । सिरी ‘ए’ मा १२ राउन्डको खेलहरु बाँकी छ ।