एजेन्सी – ला लिगाका अध्यक्ष जेभियर टेवासले रियल बेटिस र सेभियाबीचको डर्बी खेलबाट कोरोना महामारीका झन्डै तीन महिनादेखि स्थगित स्पेनिस ला लिगा सुचारु गराउने तयारी भएको बताएका छन् । 

अध्यक्ष टेवासले सेभिया र रियल बेटिसबीचको खेल ११ जुनमा हुनेमा आशावादी रहेको बताएका छन् । ‘यस्तो सम्भावना छ, ११ जुनमा खेल हुनेछ । त्यही एक खेल हो । त्यहाँ कोरोनाबाट ज्यान गुमाएका सबै व्यक्तिलाई श्रद्धान्जली दिइनेछ,’ अध्यक्ष टेवासले स्पेनी टेलिभिजन नेटवर्क मुभिस्टारसँगको अन्तर्वातामा भने । स्पेनका प्रधानमन्त्री पेड्रो सान्चेजले ८ जुनबाट ला लिगा गराउन अनुमति दिएका थिए ।

‘म आशा गर्छु कि त्यो मिति निश्चय हुनेछ । हामी चहान्छौं कि त्यो डर्वी खेल राति १० बजे हुनेछ । जर्मनी र पोर्चुगलमा दर्शकविना खेल भइरहेको छ । हामी फुटबल फर्काउन चहान्छौं,’ अध्यक्ष टेवासले भने, ‘हामी लक्ष्य नजिक छौं । टिमहरुले विशेष सावधानी अपनाएर अहिले १० जनासम्मले सामुहिक प्रशिक्षण गरिरहेका छन् । यो खुसीको कुरा हो । अब हामी रोकिएको लिग सुचारु गर्न सक्छौैं ।’

स्पेनमा मार्च १२ देखि सबै खेलकुद गतिविधि ठप्प छ । झन्डै दुई साता अघिदेखि स्पेनका शीर्ष डिभिजनका दुई लिगका क्लबहरुले कम्तीमा पनि १० जनाको समुह बनाएर प्रशिक्षण शुरु गरिसकेका छन् । आज (सोमबार) देखि १५ जना सम्मलाई सामुहिक प्रशिक्षण गर्न पाउनेछन् ।

‘हाम्रो अहिलेको मुख्य लक्ष्य ला लिगा फर्काउनु हो । त्यो प्राप्ति नजिकै छौं । हामीले अहिले सुरुवाती चार राउन्डको खेल तालिका सार्वजनिक गर्नेछौं । त्यसपछि बाँकी राउन्डका खेल तालिका सार्वजनिक हुनेछ,’ अध्यक्ष टेवासले थपे ।

ला लिगाको ११ चरणको खेल बाँकी रहँदा साविक विजेता बार्सिलोना ५८ अंक जोडेर शीर्षस्थानमा रहेको छ । समान खेलबाटै रियल म्याड्रिड ५६ अंक जोडेर बार्सिलोनालाई पछ्याइरहेको छ । स्पेन कोरोनाबाट बढी प्रभावित हुने देशमध्ये एक हो । स्पेनमा २ लाख ३५ हजार भन्दा बढीमा कोरोना संक्रमण देखिँदा २८ हजार बढिले ज्यान गुमाएका छन् ।