एजेन्सी – जर्मन फुटबल एसोसिएसन (डिएफए) ले जर्मन क्लब बोरुसिया डर्टमुन्डका युवा स्टार जाडोन सान्चोलाई चेतावनी दिएको छ ।

वल्फस्वर्गविरुद्धको खेलमा अक्रफ हाकिमीले टिमको लागि दोस्रो गोल गरेपछि खेलको नियम विपरित खेलाडीसँग अंकमाल गर्न पुगेपछि डिएफएले सान्चोलाई अब त्यसो नगर्न चेतावानी दिएको हो । खेलमा डर्टमुन्ड २-० ले विजयी भएको थियो ।

डिएफएले कोरोना त्रासकाबीच सावधानी अपनाएर गत सातादेखि जर्मन बुन्डेसलिगा आयोजना गरेको थियो । डिएफएले फुटबल सुचारु गर्ने शर्तमा गोल गर्दा एक आपसमा अंकमाल या हग नगर्ने पनि रहेको थियो । तर, कोरोना पछि दोस्रो राउन्डको खेल सुरु भइसक्दा खेलाडीहरुले लगातार नियम उल्लंघन गरिरहेका छन् ।

गतसाता हर्था बर्लिनले होफेनहाइनमाथि ३–० को जित निकाल्दा डेडरेक बोयाटाले आफ्ना सहकर्मीलाई चुम्बन गरेका थिए । त्यसपछि यो घटनाको खुब आलोचना भएको थियो । शनिबार राति भएको खेलमा दोस्रो गोलको सिर्जना सान्चो आफैंले गरेका थिए । त्यसपछि उनी गोलको सेलिब्रेसन मनाउने क्रममा हालान्ड र हाकिमीलाई अंकमाल गर्न पुगेका थिए ।

सान्चोले यो सिजन डर्टमन्डका लागि १६ गोलको लागि असिस्ट दिइसकेका छन् । सर्वाधिक असिस्ट गर्ने उनी बायर्न म्युनिखका थोमस मुलरसँगै बराबरीमा छन् । २० वर्षीय इंग्ल्यान्डका युवा स्टार सान्चो यो सिजन जर्मन बुन्डेसलिगामा ३० गोलमा संलग्न हुने पहिलो खेलाडी बनेका छन् ।