एजेन्सी – म्यानचेस्टर सिटीका पोर्चुगिज मिडफिल्डर बर्नार्डो सिल्भाले यूईएफए च्याम्पियन्स लिग अन्तर्गत राउन्ड अफ १६ को पहिलो लेगमा अग्रता लिएपनि आफ्नो क्लबले रियल म्याड्रिडलाई कमजोर नआँक्ने बताएका छन् ।

स्पेनिस पत्रिका एएससँग कुराकानीका क्रममा सिल्भाले रियलको मैदानमा हासिल गरेको जित र दोस्रो खेलको बारेमा चर्चा गरेका छन् । फ्रान्सेली क्लब एएस मोनाकोबाट म्यानचेस्टर सिटी आएका उनले पछिल्लो समय पेप गुआर्डीओलाको टोलीमा निकै प्रभाव छाडेका छन् । हाल कोरोनाका कारण खेल स्थगित भएपनि रियलको सामना गर्न टोलीले निकै मिहिनेत गर्नुपर्ने उनले बताए ।

‘ पछिल्लो पटक मैदानमा फुटबल रियलसँग नै खेलेका थियौं होला । मेरो जीवनमा कहिल्यैपनि तीन महिना फुटबल नखेली बिताएको छैन । म भाग्यमानी छु की कहिल्यै ठूलो चोटको सामना गर्नु परेन । तीन महिना फुटबल नखेली बिताउनु नयाँ कुरा हो । मैले पछिल्लो खेल को सँग खेलेको नि बिर्सिने अवस्था छ । एकदम मैदानमा जान मन लागेको छ ।’

‘रियलविरुद्ध खेल अझैपनि खुल्ला छ । रियल जस्तो टोलीसँग खेल्दा केहि पनि यकिन भन्न सकिंदैन । हामीले पछिल्ला वर्षहरुमा पनि दोस्रो खेलमा नतिजा बदलिएको देखेका छौं । बार्सिलोनाले पहिलो लेग ३-० जितेर दोस्रो लेगमा ४-० को हार बेहोरेको पनि धेरै भएको छैन ।’

‘अहिले नै केहि भन्न सकिन्न । पहिलो लेगको नतिजा हाम्रो लागि राम्रो थियो । हामी क्वाटरफाइनलमा पुग्ने बलियो स्थितिमा छौं । तर दोस्रो लेग सहज हुने छैन । हामीले पूरा ध्यान खेलमा दिएर राम्रो प्रदर्शन गर्न एकदम जरुरि छ ।’

‘ हामीले पछिल्लो तीन वर्षमा इंग्ल्यान्डमा जित्न बाँकी कुनै प्रतियोगिता छैन । प्रिमियर लिग, एफए कप, लिग कप लगायत कम्युनिटी सिल्ड पनि जितिसकेका छौं । अब क्लबको एकमात्र लक्ष्य च्याम्पियन्स लिग जित्नु हो । प्रशिक्षक पेपको पनि यहि लक्ष्य छ । हामीलाई थाहा छ यो सहज लक्ष्य होइन, तर हामी यसका लागि लड्न तयार छौं ।’

‘हामीले विपक्षी टोलीलाई कहिल्यै कमजोर आँकेका छैनौँ । अझ रियल म्याड्रिड, जसले १३ पटक उपाधि जितेको छ । रियल म्याड्रिडका खेलाडीजति अनुभव च्याम्पियन्स लिगमा अरुको सायदै होला । हामीले अहिले नै खेल जित्यौं भनेर सोच्नु गलत हुनेछ ।’