एजेन्सी – अर्जेन्टिनी राष्ट्रिय टोली तथा इटालियन क्लब इन्टर मिलानका फरवार्ड लौटारो मार्टिनेज अर्जेन्टिनाका दिग्गज फरवार्ड ग्याब्रिएल बाटिस्टुटा भन्दा बढी क्षमतावान रहेको अर्जेन्टिनी यू२० टोलीका प्रशिक्षक फर्नान्डो बाटिस्टाले बताएका छन् ।

सन् १९९० को दशकमा विश्व फुटबलमा नै चर्चा कमाउन सफल फरवार्ड बाटिस्टुटाले अर्जेन्टिनाका लागि उत्कृष्ट प्रदर्शन गरेका थिए । २२ वर्षीय लौटारोले पनि झट्ट हेर्दा बाटिस्टुटाकै झल्को दिने गरेको प्रशिक्षक फर्नान्डोले बताए । उनको अनुसार लौटारो तुलनात्मक रुपमा बाटिस्टुटा भन्दा पनि उत्कृष्ट हुने क्षमता राख्छन् ।

‘लौटारो झट्ट हेर्दा बाटिस्टुटा जस्तै खेल्ने गर्छन् । बलमा हुँदाको शैली, कुद्ने गति, हेडर गर्ने क्षमता र शारीरिक शक्ति सबै समान छन् । तर प्राविधिक रुपमा लौटारो बाटिस्टुटा भन्दा पनि राम्रो देखिन्छन् । उनी बल साथमा हुँदा पनि बढी बलिया छन् ।‘

लौटारो पछिल्लो समय क्याटलान क्लब बार्सिलोनामा जाने चर्चा चलिरहेको छ । प्रशिक्षक फर्नान्डोका अनुसार लौटारोलाई स्पेनिस लिगमा खेल्न कुनै कठिनाइ हुने छैन । सामान्यतया स्पेनिस लिगमा डिफेन्डरले इटालीको तुलनमा कम मार्क गरेर खेल्छन् । तर फर्नान्डोका अनुसार यसले लौटारोलाई फरक पर्दैन ।

‘उनलाई इटालीमा भन्दा स्पेनमा खेल्न सहज हुन्छ । इटालीमा डिफेन्सले धेरै खेल्ने ठाउँ दिदैनन्, निकै रक्षात्मक रणनीतिमा खेल हुन्छ । स्पेनमा भने इटालीको तुलनमा बढी समय पाइन्छ,’ उनले भने ।

‘रोनाल्डोले इटालीको तुलनामा स्पेनमा बढी गोल गरेको कारण पनि त्यहि हो । इटालीमा रक्षात्मक रुपमा रणनीति बलियो हुन्छ र आक्रमणमा खेलाडीलाई खेल्न कठिन हुन्छ । लौटारो स्पेनमा आएर बार्सिलोना र रियल म्याड्रिडजस्ता टोलीमा सेट हुन समय लाग्दैन,’ फर्नान्डोले थपे ।

लौटारोले जारि सिजन ३२ खेल खेल्दै १६ गोल र ४ असिस्ट प्रदान गरेका छन् । इटालियन लिग सुचारु हुने नहुने दुविधामा रहँदा क्लबले सानो समूहमा प्रशिक्षण भने सुरु गरिसकेको छ ।