एजेन्सी – स्पेनिस महारथी रियल म्याड्रिडले अर्को सिजन प्रयोग गर्ने एडिडासले निर्माण गरेको जर्सी औपचारिक रुपमा सार्वजनिक हुनुअघि नै बाहिरिएको छ ।

यसअघि नै जर्सीको डिजाइनबारे खुलासा भएपनि जर्सीको स्वरूप कस्तो हुने भन्ने खुलेको थिएन । तर फुटीहेडलाइनले विगतका वर्षझैं यस वर्ष पनि विभिन्न क्लबहरुको जर्सी औपचारिक रुपमा सार्वजनिक हुनुअघि नै चुहावट गरेको हो । रियलको यसपटकको होम जर्सीमा गुलाबी र कालो रंगको टेक्सचर सम्मिश्रण पनि रहनेछ ।

पछिल्लो सिजनमा प्रायोजकको रुपमा ‘फ्लाई इमिरेट्स’ रहँदै आएकोमा यसपटक ‘इमिरेट्स फ्लाई बेटर’ दुई पंक्तिमा लेखिएको हुनेछ । जर्सीको कलरमा सेतो रंग नै छ भने जर्सीमा एडिडासको तीन धर्के डिजाइन गुलाबी रंगको हुनेछ । हातको बाउलामा अन्तिममा गुलाबी र कालो रंगको टेक्सचर हुनेछ ।

अवे किट भने गुलाबी रंगको हुनेछ । सन् २०१४-१५ को अवे किटको छनक दिने यस किटमा सेतो रंगलाई दोस्रो रंगको रुपमा प्रयोग गरिएको छ । एडिडासको तीन धर्के डिजाइन पाखुराको माथिल्लो भागमा रहनेछ ।

तेस्रो किट भने कालो रंगमा चम्किलो गुलाबी रंगको डिजाइन सम्मिलित गरेर निर्माण गरिएको छ । जर्सीममा कालो रंगसँगै टेक्सचर प्रयोग गरेर आकर्षक जर्सी निर्माण गरिएको छ । रियलका समर्थकले सामाजिक संजालमा लेख्दै जर्सीलाई लिएर निकै उत्साहित रहेको प्रतिक्रिया दिएका छन् ।