एजेन्सी – अर्जेन्टिनी राष्ट्रिय फुटबल टोलीका प्रशिक्षक लिओनेल स्कालोनीले इन्टर मिलानका फरवार्ड लौटारो मार्टिनेज क्याटलान क्लब बार्सिलोना जाँदा अर्जेन्टिनालाई फाइदा हुने बताएका छन् ।

पछिल्लो समय ट्रान्सफर बजारमा मार्टिनेजलाई बार्सिलोनाले खरिद गर्ने प्रयास गरेको चर्चा छ । स्कालोनीले अर्जेन्टिनाको लागि यो फाइदाजनक हुने भएपनि इन्टरबाट उनलाई खरिद गर्न सहज नहुने बताएका छन् । स्कालोनीका अनुसार इन्टर मिलान आफैं पनि ठूलो क्लब भएकाले ट्रान्सफर कठिन हुने अभिव्यक्ति दिएका हुन् ।

‘लौटारो आधुनिक युगका उत्कृष्ट फरवार्ड हुन् । उनलाई हरेक ठूलो टोलीले अनुबन्ध गर्न चाहन्छ । अहिले पनि उनी ठूलो टोलीमा छन् जसले हरेक अर्को टोलीसँग प्रतिस्पर्धा गर्ने सामर्थ्य राख्छ,’ स्कालोनीले भने, ‘ उनलाई अहिले इन्टर छोड्न सहज छैन ।’

‘लौटारो यदि भाग्यमानी छन् भने उनले मेस्सीलाई आफ्नो सहकर्मीका रुपमा पाउनेछन् । एक हिसाबमा भन्दा उनीहरु जति बढी सँगै खेल्छन् त्यसले हामीलाई फाइदा पुर्याउँछ,’ प्रशिक्षकले थपे, ‘लौटारो उज्ज्वल भविष्य बोकेका युवा प्रतिभा हुन् । उनी मानसिक रुपमा पनि बलिया छन् र ठूलो लक्ष्य राखेका छन् । मैले उनलाई निर्देशन दिन सक्दिन तर उनले क्लब परिवर्तन गरेमा म उनलाई शुभकामना दिन चाहन्छु ।’

बार्सिलोनाले ३३ वर्षीय फरवार्ड लुइस सुआरेजको विकल्पमा उनलाई टोलीमा अनुबन्धन गर्न खोजेको हो । मार्टिनेजले जारी सिजन ३१ खेलमा १६ गोल गरेका छन् । यता सुआरेज भने चोटका कारण संघर्ष गरिरहँदा बार्सिलोनाले दिर्घकालिन रुपमा समस्या सुल्झाउन लौटारोलाई अनुबन्ध गर्ने तयारी गरेको हो ।