एजेन्सी – बेल्जियन विंगर तथा फरवार्ड ड्रिज मर्टेन्सले इटालियन क्लब नेपोलीसँग सम्झौता नवीकरण गरेका छन् । मर्टेन्सले नपोलीसँग थप तीन वर्षको सम्झौता नवीकरण गरेका हुन् ।

पछिल्लो समय मर्टेन्स अनुबन्धको लागि सिरी ‘ए’ क्लब इन्टर मिलान र इंग्लिस क्लब चेल्सीले यसै समरमा फ्रि ट्रान्सफरमार्फत अनुबन्ध गर्ने चासो देखाएपनि उनले नपोलीमै बस्ने निर्णय गरेका हुन् । ३३ वर्षे मर्टेन्सको सम्झौता यसै समरमा सकिदै थियो । अब उनी २०२३ को समरसम्म नेपोलीमै रहनेछन् ।

चेल्सीका प्रशिक्षक फ्रान्क लाम्पार्डले बेल्जियन फरवार्ड मर्टेन्स मनपर्ने खेलाडी रहेको र आउँदो समरमा अनुबन्ध गर्ने तयारी गरेका थिए । यस्तै इन्टर मिलानले मर्टेन्सलाई प्रतिसाता १ लाख ७० हजार अमेरिकी डलरको प्रस्ताव गरेपनि उनी नेपोलीमै बस्न राजी भएका हुन् । यससँगै नेपोलीका समर्थक पनि खुसी हुनेछन् ।

मर्टेन्स २०१३ मा डच क्लब पीएसभी आइन्डोभेनबाट नेपोली पुगेका थिए । उनी पछिल्लो समय सिरी ‘ए’ मा उत्कृष्ट फरवार्डको रुपमा आफुलाई स्थापित गरिरहेका छन् । मर्टेन्सले नपोलीका लागि हालसम्म नपोलीका लागि ३०९ खेलमा १२१ गोल गरेका छन् । मर्टेन्सले यो सिजन २९ खेलमा १२ गोल गरेका छन् ।

उनले २०१६/१७ को सिजनमा ३५ खेलमा सर्वाधिक २८ गोल गरेका थिए । नपोली यो सिजन सिरी ‘ए’ मा छैटौं  स्थानमा रहेको छ । इटली सरकारले १४ जुनसम्म खेलकुदका कुनै पनि गतिविधि नगर्न निर्देशन दिएपछि सिरी ‘ए’ पुनः सुरु हुने या नहुने आशंका पैदा भएको छ ।

इटली सरकारको यो निर्देशनपछि इटलियन फुटबल फेडेरेसन (एफआइजिसी) ले १३ जुनदेखि सिरी ‘ए’ सञ्चालन गर्ने योजनामा धक्का लागेको छ । तर, एफआइजिसीले त्यसपछिको समयमा आयोजना गर्ने अघि सारेको छ । इटलीमा ९ मार्चदेखि फुटबल स्थगित छ ।