एजेन्सी – स्पेनिस क्लब रियल म्याड्रिड, जर्मन क्लब बायर्न म्युनिख र इटालियन क्लब इन्टर मिलानले कोरोनाविरुद्ध अग्रपंक्तिमा रहेर काम गरिरहेका स्वास्थ्यकर्मीको सहयोगका लागि मैत्रीपूर्ण प्रतियोगिता खेल्ने भएका छन् ।

युरोपेली सोलिडारिटी कप नाम दिइएको प्रतियोगिता सन् २०२१ मा आयोजना गर्ने तयारी रहेको छ । कोरोनाले ग्रस्त रहेको स्पेन र इटालीका स्वास्थ्यकर्मीको सहयोगार्थ प्रतियोगिता आयोजना गर्न लागिएको हो । तीनै क्लबले यसका लागि स्वीकृति दिएपछि अब उचित मितिका लागि आयोजकले तयारी गरिरहेको छ ।

स्पेन र इटाली युरोपमा कोरोनाले सबैभन्दा बढी प्रभावित राष्ट्रमध्य हुन् । इटालीमा ३२ हजार बढीको मृत्यु हुँदा स्पेनमा झन्डै ३० हजारले ज्यान गुमाइसकेका छन् । पछिल्लो दुई महिनामा जनजीवनसँगै खेलकुद समेत प्रभावित हुँदा आर्थिक स्थिति पनि कमजोर भएको छ ।

युरोपेली सोलिडारिटी कप सन् २०२१ मा गर्दा समर्थकको उपस्थिति पनि हुने विश्वास गरिएको छ । अहिलेको योजना अनुसार प्रतियोगिता सबै तीन सहरमा आयोजना हुनेछ । रियल म्याड्रिडले जारी गरेको विज्ञप्ति अनुसार तीन क्लबले संयुक्त रपमा आयोजना गर्न लागेको प्रतियोगिताबाट उठेको रकम स्पेन र इटालीमा स्वास्थ्य सामग्री खरिदका लागि प्रयोग हुनेछ ।

प्रतियोगिताको म्याड्रिड र इन्टरको खेल बर्नाबाउमा, इन्टर र बायर्नको खेल सानसिरोमा तथा बायर्न र म्याड्रिडको खेल आलियान्ज एरिनामा हुनेछ । प्रतियोगिताका लागि हरेक टोलीको खेल तालिका अध्ययन गर्नुपर्ने भएकाले हाललाई मिति सार्वजनिक गरिएको छैन ।