एजेन्सी – इंग्लिस क्लब चेल्सीका युवा स्टार विंगर कलुम हड्सन ओडोई हिरासतबाट धरौटिमा रिहा भएलगत्तै क्लबसँगको प्रशिक्षणमा जोडिएका छन् । कोरोना परिक्षण गर्दा नेगेटिभ देखिएपछि उनलाई क्लबले प्रशिक्षणमा सामेल गरेको हो ।  

१९ वर्षीय इंग्लिस स्टार ओडोई लकडाउनको नियम तोड्दै बाहिर निस्किएको र आफ्नै घरमा ल्याएर एक महिला मोडललाई दुर्व्यवहार गरेको आरोपमा आइतबार विहान पक्राउ परेका थिए ।  चेल्सीले क्लबको हेडक्वाटर कोबहममा प्रशिक्षण गरिरहेको छ । उनलाई क्लबका प्रशिक्षक फ्रान्क लाम्पार्डले टिमसँगै अभ्यास गर्नको लागि ग्रीन लाइटको सिग्नल दिएपछि उनी प्रशिक्षणमा देखिएका हुन् ।

आइतबारको घटनाको बिषयमा ओडोई र क्लबले कुनै प्रतिक्रिया जनाएका छैनन् । विभिन्न सञ्चारमाध्यममा भने उनले दुर्व्यवहार गर्दै बलात्कारको प्रयास गरेको उल्लेख गरिएको छ । चेल्सी मेडिकल स्टाफले सरकारको नियममा कोरोना परिक्षण गरिएको र कोरोना नेगेटिभ आएपछि उनले टिमसँगै प्रशिक्षणमा सामेल हुन पर्याप्त आधार रहेको बताएको छ । प्रिमियर लिगले खेलाडीहरुलाई सानो समुहमा अभ्यास गर्ने अनुमती प्रदान गरेको छ ।

सोही अनुसार खेलाडीले पहिलो चरणको अभ्यासमा सहभागी हुने मौका पाएका छन् । र विभिन्न क्लबले परिक्षण सकेर खेलाडीलाई अभ्यासमा सहभागी गराएका छन् । ओडोईले समुहमा एनगोलो कान्टे, क्रिस्टियन पुलिसिक, कर्ट जुमा र किपा एरिजाबलागासँग अभ्यास गरेको तस्विर देख्न सकिन्छ ।

ओडोईले गत मार्चमा चेल्सीसँग थप ५ वर्षको सम्झौता नवीकरण गरेका थिए । ओडोईलाई गत मार्चमै कोरोना संक्रमण देखिएको थियो ।