एजेन्सी – बार्सिलोनाले सन् २०१२/१३ को सिजन स्पेनिस ला लिगा उपाधि जित्दा टोलीमा रहेका मिडफिल्डर एलेक्स संगले आफू पैसाकै लागि भनेर क्याटलान क्लबमा अनुबन्ध भएको बताएका छन् ।

क्यामरुनको राष्ट्रिय टोलीबाट लामो समय खेलेका संग इंग्लिस क्लब आर्सनलबाट बार्सिलोना पुगेका थिए । आर्सनलका लागि २ सय भन्दा बढी खेल खेलेका संगले बार्सिलोनामा एक सिजन बिताउँदै २० खेल खेले । उनले करीअरको एकमात्र ट्रफीका रुपमा बार्सिलोनाबाट नै स्पेनिस लिगको उपाधि जितेका थिए ।

संगले बार्सिलोनाले अनुबन्ध गर्ने इच्छा देखाउने बितिक्कै आफू त्यहाँ जान राजी भएको बताए । ‘ मैले आर्सनल करीअर भरमा पनि १ लाख पाउँद बचत गर्न सकिन । मेरो तलब मासिक १५ हजार थियो र बाहिर मानिसले मलाई अर्बपति छु भन्ने सोच्थे,’ उनले भने, ‘ बार्सिलोनाले सम्पर्क गर्नेबितिकै मैले आफू तयार रहेको बताएँ । मैले करीअर सकिएपछि आफ्नो परिवारको लागि भनेर नै पैसा कमाउने सोचले त्यहाँ पुगें ।’

‘मैले सम्झौता गर्नुअघि नै बार्सिलोनाका खेलकुद निर्देशकलाई भेटेको थिएँ । उनले मलाई धेरै खेल्न नपाउने जानकारी दिएका थिए । मलाई त्यसबारे मतलब थिएन । मलाई पैसा कमाउनु थियो र त्यसैसँग मतलब राखें,’ उनले थपे, ‘२० वर्षको उमेरमा फरारी चढ्ने धनि हुँदैन । ५० वर्षको उमेरमा पनि बेन्टली चढ्ने छ भने उसलाई सम्मान मिल्छ ।’

संगले त्यसपछिको दुई सिजन बार्सिलोनाबाट लोनमा इंगलिस क्लब वेस्ट ह्याममा बिताए । उनले वेस्ट ह्याममा खेलेपनि बार्सिलोनाले उनको तलब पूरै बेहोरेको थियो । त्यसपछि सन् २०१६ मा रसियाली क्लब रुबिन काजान पुगेका उनले सन् २०१८ मा स्विटजरल्यान्डको सियोनबाट खेले ।