एजेन्सी – कोरोना महामारीकै बीचमा गएको शनिबारदेखि जर्मन बुन्डेस लिगा फर्किएको छ । सोमबार राति मात्रै कोरोनापछि पहिलो चरणको खेलहरु सकिएका छन् । स्वभाविक रुपमा उपाधिको दावेदार टोलीले जित हात निकालेका छन् ।   

स्पेनिस ला लिगा, इंग्लिस प्रिमियर लिग र इटालियन सिरी ‘ए’ फर्कने तयारीमा छन् । सबै क्लबहरुले प्रशिक्षण थालिसकेका छन् । सोमबारदेखि ला लिगामा १० जनासम्मलाई सामुहिक प्रशिक्षणका लागि अनुमति पाइसकेका छन् । तर, लिग शुरु हुने आधिकारिक मिति सार्वजनिक हुन सकेको छैन । सम्भवत ला लिगा, प्रिमियर लिग र सिरी ‘ए’ जुन दोस्रो सातादेखि शुरु हुन सक्नेछ ।

यसैबीचमा रियल म्याड्रिडका प्रशिक्षक जिनेदिन जिदानले सिजनको बाँकी खेल शुरु हुनेमा आशावादी रहेको र रियल उच्च तयारीका साथ आउने बताएका छन् ।  ‘हामीले निकै कठिन र चुनौतीपुर्ण समयको सामना गरिरहनु परेको छ । यो क्षति र पीडालाई व्यक्त गर्न सकिदैन । तर, हामी यि सबैबाट पार पाएर सामान्य रुपमा फर्कनुपर्दछ,’ जिदानले स्पेनिस पत्रिका मार्कासँग भने, ‘हामी सुरक्षित रुपमा फुटबल फर्कन तयार छौं । हामी उच्च तयारीका साथ आउने छौं ।’

यस्तै जिदानले ला लिगामा बार्सिलोनासँग २ अंकले पछि रहेपनि अहिले नै उपाधिबारे केही भन्न नसकिने बताएका छन् । ‘हामी बार्सिलोनासँग २ अंकले पछि छौं । तर, अझै ११ खेल बाँकी छ । यो खेलले नतिजा जतापनि लैजान सक्दछ । तर, हामी बार्सिलोनाभन्दा अघि बढ्न चहान्छौं । च्याम्पियन बन्न चाहन्छौं । त्यसका लागि हामी सबथोक गर्न तयार छौं,’ जिदानले भने । ला लिगाको २७ चरणको खेल सकिँदा बार्सिलोनाको ५८ तथा रियलको ५६ अंक छ ।

यस्तै जिदानले च्याम्पिन्स लिगमा म्यानचेस्टर सिटीसँगको खेलको बारेमा अहिल केही पनि नसोचेको र ध्यान ला लिगामा नै रहेको बताएका छन् । रियल च्याम्पियन्स लिगको प्रि–क्वाटर फाइनलको पहिलो लेगमा घरेलु मैदानमा सिटीसँग २–१ ले पराजित भएको थियो । दोस्रो लेग सिटीको मैदानमा हुनेछ ।