एजेन्सी – स्पेनिस क्लब सेल्टा डि भिगोका विंगर पियोन सिस्टो लिग स्थगित भएपछि स्पेनको लकडाउन नीति तोड्दै आफ्नो देश डेनमार्क पुगेका थिए । क्लबलाई खबर नगरि घर फर्किएका उनलाई सेल्टाले ६० हजार युरो (झन्डै ७८ लाख नेपाली रुपैयाँ) जरिवाना गरेको छ ।

सबै खेलाडीहरु सेल्फ क्वारेन्टाइनमा रहँदा सिस्टोले स्पेनको लकडाउन नीति तोड्दै झन्डै २ हजार किलोमिटर दुरी पार गर्दै डेनमार्क पुगेका थिए । कोप भिगोका अनुसार उनी २६ घन्टाको लामो कार यात्रा आफैं तय गर्दै डेनमार्क पुगेका थिए । स्पेनिस लिग सुचारु हुने तयारी भएसँगै उनी स्पेन फर्किएका छन् ।

स्पेन फर्किएपनि उनलाई प्रशिक्षणमा भने सामेल गराइएको छैन । सेल्टाले सोमबारदेखि सामुहिक प्रशिक्षण सुरु गर्दैछ । खेलाडीहरुमा दोस्रो चरणको परिक्षण पनि नेगेटिभ आएपछि प्रशिक्षणका लागि खेलाडीहरु समुहमा जान सक्ने प्रावधान रहेको छ ।

डेनमार्कबाट फर्किएका सिस्टो पहिलो चरणको परिक्षणमा सहभागी थिएनन् । उनले दोस्रो चरणको परिक्षणमा भने सहभागिता जनाए । प्रशिक्षक ओस्कार गार्सियाले सिस्टो आफैंले प्रशिक्षणमा सहभागी हुन नचाहेको बताए । क्लबका अध्यक्ष कार्लोस मोरिनोले पनि सिस्टोले क्लबसँग समन्वय नगरी आफ्नो समस्या नाबताउँदा केहि कठिनाइ भएको स्वीकारे ।

२५ वर्षीय सिस्टोले यो सिजन १९ खेलमा दुई गोल गरेका छन् । २०१५ देखि डेनमार्क टोलीमा रहेका सिस्टोले २१ खेलमा १ अन्तर्राष्ट्रिय गोल गरेका छन् ।  विश्वमा महामारीको रुपमा फैलिएको कोरोना भाइरसका कारण स्पेनिस लिग स्थगित छ । सेल्टा डि भिगो २७ अंक जोडेर रेलिगेसन जोनभन्दा १ स्थान माथि छ ।