एजेन्सी – जर्मन बुन्डेसलिगा अन्तर्गत शनिबार जारी खेलमा बोरुसिया डर्टमुन्डले चिर परिचित प्रतिद्वन्द्वी साल्केविरुद्ध पहिलो हाफमै २-० को अग्रता लिएको छ । डर्टमुन्डका लागि एर्लीङ हालान्ड र राफेल गुरेरोले १-१ गोल गरे ।

नर्वेली फरवार्ड एर्लीङ हालान्डले आफ्नो उच्च लयलाई कायम राख्दै डर्टमुन्डलाई सुरुवाती अग्रता दिलाएका हुन् । उनले खेलको २९ औं मिनेटमा गोल गरेका थिए । जुलियन ब्रान्टको फ्लिकपछि थोर्गन हाजार्डले दायाँ विङ्बाट गरेको क्रसमा हालान्डले गोल गरे । उनले पेनाल्टी क्षेत्रभित्र पहिलो टचलाई गोलमा परिणत गरेका थिए ।

त्यसअघि २६ औं मिनेटमा साल्केले अग्रता लिने सुवर्ण अवसर गुमाएको थियो । ड्यानीएल कालिजुरीले ६ यार्ड बक्सभित्रबाट गरेको प्रहारलाई गोलरक्षक रोमन बुर्कीले दोस्रो प्रयासमा बचाएका थिए । सातौँ मिनेटमा पनि कालिजुरीको प्रहारले पोस्टको दिशा लिन सकेको थिएन ।

खेलको १५ औं मिनेटमा घरेलु टोली डर्टमुन्डका राफेल गुरेरोको प्रहार पोस्टभन्दा थोरै परबाट बाहिरिएको थियो । लगत्तै हालान्डले पेनाल्टी क्षेत्रको बायाँ भागबाट गरेको प्रहारले गोलरक्षकलाई समस्या दिन सकेन । ३५ औं मिनेटमा अक्रफ हाकिमीको क्रसमा गुरेरोको प्रहार बाहिरियो ।

खेलको ४१ औं मिनेटमा डर्टमुन्डका मोहमद दाहुदले पेनाल्टी क्षेत्रबाहिरबाट गरेको शक्तिशाली प्रहार डिफेन्डर सलिफ सानेलाई लाग्दै बाहिरिएको थियो । ४४ औं मिनेटमा गुरेरोले डर्टमुन्डको अग्रता दोब्बर पारे । ब्रान्टको थ्रु बललाई गुरेरोले पेनाल्टी क्षेत्रको बायाँ भागबाट गोलमा परिणत गरे ।

यो खेल जितेमा डर्टमुन्डले शीर्षस्थानको बायर्न म्युनिखसँगको अंक दुरी १ अंकमा झार्नेछ । साल्के भने खेलमा फर्कन नसके ३७ अंकसहित आठौं स्थानमा कायम रहनेछ ।