एजेन्सी – इंग्ल्याण्ड राष्ट्रिय टोलीका कप्तान तथा टोटेनहम हट्स्परका फरवार्ड ह्यारी केनले आफ्नो पूर्व क्लब लेटन ओरिएन्टलाई अर्को सिजन प्रायोजन गर्ने भएका छन् ।

केनले ओरिएन्टको होम, अवे र तेस्रो जर्सीमा रहेको विज्ञापन गर्ने स्थान खरिद गरेका हुन् । उनले ती विज्ञापन गर्ने स्थानमा मानसिक स्वास्थ्यको अस्पतालको लोगो राख्न क्लबलाई भनेका छन् । कोरोना संक्रमणको अवस्थामा अग्रपंक्तिमा रहेर काम गर्ने स्वास्थ्यकर्मीलाई धन्यवाद दिन केनले यो कदम चालेका हुन् । सम्झौता एक सिजनलाई मान्य हुनेछ ।

केनले १७ वर्षको उमेरमा ओरिएन्टबाट खेल्दै व्यावसायिक फुटबलमा डेब्यु गरेका थिए । त्यसबेला टोटेनहमबाट लोनमा पुगेका उनले १८ खेलमा ५ गोल गरेका थिए । ओरिएन्टले बिहीबार विज्ञप्ति जारी गर्दै केनको कदमको स्वागत गरेको छ । क्लबले हरेक जर्सीबाट आउने रकमको १० प्रतिशत रकम लोगो अंकित अस्पताललाई दिइने जनाएको छ ।

केनले क्लबलाई सहयोग गर्न पाउँदा खुसी व्यक्त गरे । ‘म ओरिएन्टबाट केहि माइल जन्मे हुर्केको हुँ । मलाई व्यावसायिक फुटबलमा पहिलो खेल खेल्ने अवसर दिने क्लबलाई सहयोग गर्न पाउँदा निकै खुसी छु,’ उनले थपे, ‘ मैले यसबाट कोरोनाविरुद्ध अग्रपंक्तिमा रहेर लडिरहेका स्वास्थ्यकर्मीलाई पनि धन्यवाद भन्न पाएँ ।’

क्लबका प्रमुख कार्यकारी ड्यानी म्याक्लिनले केनको यो कदमलाई स्वागत गरे । ‘हामीले सरल रुपमा सुरु गरेको छलफलले निकै राम्रो नतिजा दिएको छ । हामी स्वास्थ्यकर्मीलाई धन्यवाद दिने कसरी भन्ने सोचिरहेका थियौं । केनको यो कदमले सबैको ध्यान आकर्षण पनि गर्नेछ र हामीले स्वास्थ्य क्षेत्रमा केहि योगदान पनि दिन सक्नेछौं,’ उनले भने ।