एजेन्सी – क्वारेन्टिन नियम उल्लंघन गरेपछि जर्मन बुन्डेसलिगा क्लब अग्सबर्गका मुख्य प्रशिक्षक हेईको हेरलीचलाई जर्मन फुटबल लिग (डिएफएल) ले एक खेलमा निलम्बन गरेको छ । 

लिग हुने संघारमा क्वारेन्टिनको नियम तोड्दै उनी होटलबाट दन्त मन्जन किन्न बजार निस्किएको बताइएको छ । नियम तोडेको पुष्टि भएपछि डिएफएलले उनलाई लिगको पहिलो खेलमा निलम्बन गर्ने निर्णय गरेको हो । हेरलीच आफैंले पनि गल्ती गरेको स्वीकार्दै सजाय मान्ने बताएका छन् ।

हेरलिचको टिमले शनिबार वल्फ्सवर्गको सामाना गर्दैछ । बायर लिभरकुसेनका पुर्व प्रशिक्षक ४८ वर्षे हेर्लिच गएको १० मार्चमा क्लबको मुख्य प्रशिक्षकमा नियुक्त भएका थिए । घरेलु मैदानमा वल्फ्सवर्गसँग उनको पहिलो खेल थियो । अब उनले खेलअघि हुने टोलीको प्रशिक्षणमा पनि सहभागी नहुने बताएका छन् ।

‘होटल छाडेर मैले गल्ती गरेको हो । होटलबाट बाहिर निस्कने समयमा मैले सबै स्वच्छ उपाय अबलम्बन गरेका थिए । म यसलाई लुकाउन सक्दिन । यस अवस्थामा म आफ्नो टिमसँग काम गर्ने छैन । शुक्रबारको प्रशिक्षण र शनिबारको खेलमा म उपस्थित हुनेछैन,’ क्लबले जारी गरेको विज्ञप्तिमा हेरलीचले उल्लेख गरेका छन् ।

लिग सुरु हुने क्रममा हरेक क्लबले खेलाडी र स्टाफको नियमित रुपमा परिक्षण गरिरहेका छन् । हेरलीचको अब दुईपटक नतिजा नेगेटिभ आएपछि मात्र उनी टिमको प्रशिक्षणमा सहभागी हुन पाउनेछन् । अग्सबर्ग बुन्डेस लिगाको १४औं स्थानमा रहेको छ । जुन रेलिगेसन जोनमा १६औं स्थानको प्ले अफ खेल्ने भन्दा ५ अंक बढी हो ।