एजेन्सी – इटाली फर्केयता युभेन्ट्सका सुपरस्टार क्रिस्टियानो रोनाल्डो आइसोलेसनमा छन् । तर उनले घरमा पनि उनको सक्रियाता भने रोकिएको छैन । प्रशिक्षणमा फर्कनुअघि उनी घरमै प्रशिक्षण गरिरहेका छन् । टोलीका कुनै खेलाडी विनानै उनको प्रशिक्षण जारी छ ।

कोरोना भाइरस कोभिड १९ का कारण सिरि ए स्थागित भएपछि रोनाल्डो आफ्नो आमालाई भेट्न स्वदेश फर्केका थिए । विरामी आमासँग लामो समय बिताएर रोनाल्डो गत साता टुरिन फर्केका थिए । माडेरियामा रहँदा पनि उनले स्थानिय क्लबमा पुगेर अभ्यास गरेका थिए ।

रोनाल्डो परिवारसहित बुधबार टुरिन पुगेका थिए । पुन: सुरु हुने सम्भावना रहेको सिरि ए अघि उनी टोलीको प्रशिक्षणमा सामेल हुने अपेक्षा गरिएको छ । अहिले उनी १४ दिनको आइसोलेसनमा रहेका छन् ।

क्लबको प्रशिक्षणमा फर्कन अझै केहि कुर्नुपर्ने भएपछि रोनाल्डो बगैंचामा अभ्यासम व्यस्त हुन थालेका छन् । उनलाई प्रशिक्षणमा छोरा क्रिस्टियानो जुनियरले साथ दिइरहेका छन् । उनका छोरा पनि युभेन्ट्सको एकेडेमीमा प्रशिक्षण गर्छन् ।

बाबुछोराको अभ्यासको भिडियो इन्स्टाग्राममा पोष्ट गरिएको छ । रोनाल्डोले लेखेका छन्, ‘जस्तो बाबु उस्तै छोरा । सबैभन्दा माथि खुसी ।’

इटालीमा मे १८ देखि क्लबहरुलाई प्रशिक्षण गर्न स्विकृति दिइएको छ । रियल म्याड्रिड र म्यानचेस्टर युनाइटेडका पूर्व स्टार रोनाल्डो मे ४ मा टुरिन फर्केका थिए । अब उनी टोलीको प्रशिक्षण सुरु हुँदा त्यसमा सामेल हुने विश्वास गरिएको छ ।