एजेन्सी – लामो समयदेखि उच्च स्तरको प्रदर्शन गरिरहेका सुपरस्टारद्वय बार्सिलोनाका लियोनल मेस्सी र युभेन्ट्सका क्रिस्टियानो रोनाल्डोबीच को उत्कृष्ट भन्ने बहस समयमा समयमा चल्ने गरेको छ ।

यसक्रममा लिभरपुलका प्रशिक्षक योर्गन क्लोपले पनि उनीहरुको तुलना गरेका छन् । जर्मन प्रशिक्षकले मेस्सीलाई आफ्नो रोजाईमा राखेपनि उनले रोनाल्डो पनि उत्तिकै प्रशंसा गरेका हुन् । ‘मेरो लागि मेस्सी उत्कृष्ट हुन् । तर म रोनाल्डोको धेरै तारिफ गर्न सक्दिन किनकी मैले यसअघि धेरै गरिसकेका छु ,’ क्लोपले भनेका छन् ।

क्लोपले अर्जेन्टिनाका कप्तान मेस्सी र पोर्चुगलका कप्तान रोनाल्डो दुवै रोक्न असम्भव रहेको पनि बताएका छन् । उनले भने, ‘तर मेस्सी जन्मजात नै शारीरिक रुपमा केहि कमजोर छन् । यसका बाबजुद उनले आफ्नो कमजोरीलाई खेलमा हावी हुन् दिँदैनन् । ‘

यदि पूर्ण रुपमा खेलाडीका रुपमा हेर्ने हो भने त्यसका लागि रोनाल्डो भएको पनि क्लोपले बताएका छन् । ‘यदि कोहि उत्कृष्ट खेलाडी हुन छ भने उ सँग रोनाल्डोका जस्तो उचाई, शरीर र गति हुनु पर्दछ,’ उनले थपे, ‘माथिल्लो स्तरको प्रर्दशनले मात्र कोहि व्यवसायिक रुपमा पूर्ण हुन सक्छ ।’

तर, अर्को तर्फ मेस्सीले भने सहज रुपमा सबै काम गर्दै आएको बताएका छन् । ‘मैदानमा म मेस्सीलाई केहि बढी मन पराउँछु । उनले फुटबललाई निकै सहज देखाउँछन्, जुन पक्कै त्यस्तो छैन,’ उनले भने, ‘तर, रोनाल्डो अविश्वसनिय खेलाडी हुन् । को उत्कृष्ट भन्न सहज छैन । यी दुईबीचको एउटा समानता भनेको लामो समय सम्म फुटबल दुनियाँमा उनीहरुको चर्चा हुनेछ ।’