एजेन्सी – ब्राजिलियन मिडफिल्डर रोनाल्डिन्होले बार्सिलोना रोज्नुअघि इंग्लिस क्लब म्यानचेस्टर युनाइटेडबाट खेल्न मौखिक सम्झौता गरेपनि अन्तिम समयमा बार्सिलोना गएको इंग्ल्यान्डका राष्ट्रिय टोलीका पूर्व खेलाडी पल स्कोल्सले बताएका छन् ।

सन् २००२ को विश्वकपमा उत्कृष्ट प्रदर्शन गरेपछि रोनाल्डिन्होलाई अनुबन्ध गर्न युरोपका ठूला क्लबहरु लागेका थिए । युनाइटेडले रोनाल्डिन्होसँग छलफल गरेर मौखिक सम्झौता गरिसकेको थियो । उनले कुन नम्बर जर्सी लगाउने समेत निधो भइसकेको थियो । तर अन्तिम समयमा उनले बार्सिलोना जाने निर्णय गरे ।

त्यसबेला पेरिस सेन्ट जर्मेनबाट खेलिरहेका रोनाल्डिन्होलाई भित्र्याउन प्रशिक्षक सर एलेक्स फर्गुसन आफैं लागेका थिए । तर अन्तिम समयमा रोनाल्डिन्होले धोका दिँदा फर्गुसन निकै निराश भए । मिडफिल्डर स्कोल्सले पनि रोनाल्डिन्होसँग एकै टोलीमा खेल्ने धोको पूरा नहुँदा निकै नराम्रो लागेको बताए ।

‘ त्यसबेला २-३ जना खेलाडी क्लबमा आउने चर्चा चलेको थियो । रोनाल्डिन्हो आउने पक्काजस्तै भएपछि म मिडफिल्डमा उनीसँग खेल्न उत्साहित थिएँ । प्रशिक्षक फर्गुसनले पनि उनी टोलीमा आउने बताएपछि उनी आउने अपेक्षा थियो, तर उनले अन्तिम समयमा बार्सिलोना रोजे,’ स्कोल्सले सुनाए ।

‘ उनको युनाइटेडमा औपचारिक घोषणा हुन मात्र बाँकी थियो । यहाँसम्म की जर्सी नम्बर समेत छिनोफानो भएको अवस्था थियो । तर अन्तिम समयमा उनले बार्सा रोजे,’ स्कोल्सले स्मरण गरे, ‘ केहि दिनपछि नै हाम्रो बार्सिलोनासँग मैत्रीपूर्ण खेल थियो । उक्त खेलमा हाम्रा टोलीका खेलाडीले उनलाई फल हान्न पनि खोजे । उनले देखाएको आशा निराशामा जो बदलिएको थियो ।’

रोनाल्डिन्होले बार्सिलोनामा ५ वर्ष खेल्दै निकै सफल समय व्यतित गरे । उनले २ सय ७ खेल खेल्दै ९४ गोल गरे । यसक्रममा दुई लिग उपाधि र च्याम्पियन्स लिग जित्न पनि उनी सफल रहे । उनी दुई पटक फिफाको वर्ष उत्कृष्ट खेलाडी पनि बने ।