एजेन्सी – इंग्लिस क्लब न्युक्यासल युनाइटेडले वेल्स तथा स्पेनिस क्लब रियल म्याड्रिडका स्टार फरवार्ड ग्यारेथ बेललाई क्लबमा अनुबन्धका लागि आकर्षक प्रस्ताव पेश गर्ने भएको छ । 

पछिल्लो समय रियलमा संघर्ष गरिरहेको अवस्थामा न्युक्यासलले बेललाई आकर्षक प्रस्ताव अघि सारेको हो । न्युक्यासलले ३० वर्षीय बेललाई ५३ मिलियन पाउन्डको प्रस्ताव गर्ने उल्लेख गर्दै प्रिमियर लिगमा फर्काउने योजना बनाएको छ ।

बेल पछिल्लो समय रियलमा खुसी छैनन् । विशेष गरी क्लबका प्रशिक्षक जिनेदिन जिदानसँग बेलको सम्बन्ध राम्रो रहेको छैन । त्यसैले पनि बेल रियल छोड्ने योजनामा छन् । यससँगै बेल अनुबन्धमा न्युक्यासल पनि उभिएको छ । यसअघि बेलकै पुर्व क्लब टोटेनहम र अमेरिकी एमएलएस क्लब इन्टर मियामीले पनि बेलमा चासो देखाइरहेको छ ।

साउदी अरेबियाको सार्वभौम धन कोषले इंग्लिस प्रिमियर लिग क्लब न्युक्यासल खरिद गर्ने प्रक्रिया अघि सारिरहेको छ । साउदीको कोषले ३ सय मिलियन पाउण्डमा न्युकसलको स्वामित्व खरिद गर्न क्लबका मालिक माइक एस्लीसँग सम्झौता गरिसकेको छ ।

साउदीले खरिद गर्ने प्रक्रिया अगाडी बढाएसँगै प्रिमियर लिगले स्वीकृति दिन बाँकी छ । साउदीको लगानी सम्भव भएमा न्युक्यासलले आउदो समरमा खेलाडी अनुबन्धमा ३०० मिलियन पाउन्ड खर्च गर्ने योजना बनाइरहेको छ ।

कोरोना महामारीको कारण रियल म्याड्रिडले केही स्टार खेलाडी बेचेर आर्थिक भार कम गर्ने योजनामा छ । जसमा बेलसँगै हामेस रोड्रिग्वेज लगायतका खेलाडी छन् । बेल २०१३ मा त्यतिबेलाको विश्व कीर्तिमानी मुल्यमा ८६ मिलियन पाउन्डमा टोटेनहम हट्सपरबाट रियलमा पुगेका थिए । उनले रियलमा सबैखाले उपाधि जितिसकेका छन् ।

बेलले यो सिजन रियलका लागि १८ खेलमा ३ गोल मात्रै गरेका छन् । रियलमा हालसम्म बेलले २४९ खेलमा १०५ गोल गरेका छन् । बेलले रियलबाट चारपटक युइएफए च्याम्पियन्स लिग, समान तीनपटक फिफा क्लब विश्वकप र युइएफए सुपर कप तथा समान एकपटक स्पेनिस ला लिगा, कोपा डेल रे र स्पेनिस सुपरकोपा जितेका छन् ।