एजेन्सी – एट्लेटिको म्याड्रिडले युरोपा लिग जितेको यो मंगलबार १० वर्ष पुरा भएको छ । थप समयमा फुलह्यामलाई २–१ ले हराउँदै एट्लेटिको च्याम्पियन बनेको थियो । टोलीलाई जित दिलाउन दुवै गोल डिएगो फोर्लानले गरेका थिए ।

फोर्लान अहिले ४१ वर्षका भए । उनी अहिले पेनारोलको प्रशिक्षकका रुपमा काम गरिरहेका छन् । त्यो उनको युवा अवस्था हुँदाको क्लब पनि हो । तर, उनले स्पेनिस टोलीलाई दश वर्षअघि दिलाएको त्यो सफलतालाई स्मरण गरेका छन् ।

‘फुलह्यामविरुद्ध खेलेको त्यो युरोपा क्लबको फाइनल एट्लेटिको बस्दाको सबैभन्दा उत्कृष्ट समय थियो,’ उनले स्मरण गरे, ‘मलाई अहिले पनि सम्झना छ हामी नियमित समयमा नै जितका लागि केहि हद सम्म हकदार थियो । ‘

उनले आफुलाई खेल पेनाल्टीमा पुगेको भने खासै मन नपर्ने बताएका छन् । ‘थप समयमा गएपनि म पेनाल्टीमा नजाओस् भन्नेमा थिए ,’ उनले भने, ‘कतिपय अवस्थामा ९० मिनेट भित्र जितको हकदार भएपनि पेनाल्टीमा पुग्दा अन्त्यमा हारिएको हुन्छ । म त्यस्तो अन्त्य चाहँदैन थिएँ ।’

फोर्लानको नायकत्वमा एट्लेटिकोले सफलता प्राप्त गरेपछि उनी समर्थकका बीचमा लोकप्रिय बने । ‘त्यो सामूहिक उपलब्धी थियो । कसले गोल गर्यो त्यो महत्वपूर्ण होइन । महत्वपूर्ण भनेको हामीले जित्नु थियो । थप समय सकिनु ३ मिनेट अघि हामी गोल गर्न सफल भयौं,’ उनले भने, ‘सहर नै रातो र सेतो हुँदा मेरो ध्यान तानिएको थियो । मलाई त्यो क्षण निकै मन पर्यो । ‘