एजेन्सी – स्पेनिस क्लब बार्सिलोना र इटालियन क्लब इन्टर मिलान अर्जेन्टिना फरवार्ड लोउटारो मार्टिनेजको बार्सिलोना प्रस्थानको विषयमा सहमति नजिक पुगेको छ ।

बार्सिलोनाले मार्टिनेजको लागि इन्टर मिलानलाई दुई खेलाडी र ६० मिलियन पाउन्ड दिन सहमत भएको बुझिएको छ । सहमति अनुसार बार्सिलोनाले मार्टिनेजलाई ६० मिलियन पाउन्ड र २ खेलाडी दिनेछन् । आर्टुरो भिडालसँगै नेल्सन सेमिडो र इमर्सनमध्ये एक खेलाडी बार्सिलोनाले इन्टर मिलान पठाउने सहमति भएको छ ।

बार्सिलोनाले मार्टिनेजलाई ४ बर्षका लागि अनुबन्ध गरिएको बुझिएको छ । यस विषयमा बार्सिलोनाले अर्काे साता घोषणा गर्न सक्नेछ ।
कोरोना भाइरस (कोभिड–१९) को महाहमारीका कारण आर्थिक संकट सामना गरिरहेपनि बार्सिलोना मार्टिनेजलाई जसरी पनि अनुबन्ध गर्ने योजना बनाएको थियो । मार्टिनेजको विषयमा सहमति नजिक पुगेको बार्सिलोनाको अर्काे योजना आफ्ना पुर्व ब्राजिली स्टार नेयमारलाई क्लबमा फर्काउने रहेको छ ।

मार्टिनेज २०१८ मा अर्जेन्टिनी क्लब रेसिङबाट २० मिलियन पाउन्डमा इन्टर मिलान पुगेका थिए । २२ वर्षीय मार्टिनेजले यो सिजन इन्टर मिलानका १६ गोल गरेका छन् ।