एजेन्सी – स्विडिस फरवार्ड ज्लाटन इब्रहिमोभिच इटाली फर्केलगत्तै कवारेन्टिनमा बस्नुपर्ने भएको छ । कोरोना संक्रमणका कारण इटालियन लिग स्थगित भएपछि उनी आफ्नै राष्ट्र स्विडेन फर्केका थिए ।

स्विडेनमा कडा लकडाउन कार्यान्वयन नभएका कारण इब्राले त्यहाँ स्थानीय क्लब हम्मार्बीमा प्रशिक्षण गरेका थिए । स्टकहममा रहेको उक्त क्लबमा ज्लाटनले गतवर्ष मात्र २५ प्रतिशत शेयर खरिद गरेका थिए । उनले स्विडेनमा रहँदा हम्मार्बीकै पुरुष र महिला टोलीसँग प्रशिक्षण गरेका थिए । उनले एक प्रशिक्षण खेलमा पनि सहभागिता जनाएका थिए । त्यसैले कुनै खतरा नहोस भनेर मिलानमा प्रशिक्षण गर्नुअघि उनी क्वारेन्टिनमा बस्ने भएका छन् ।

उमेरले ३८ वर्ष पुगेपनि ज्लाटनले लगातार शीर्ष श्रेणीको फुटबल खेलिरहेका छन् । उनले आफ्नो करीअरको अन्त्य आफ्नै क्लब हम्मार्बीबाट खेल्दै अन्त्य गर्ने सम्भावना पनि रहेको छ । आफ्नै लगानी रहेको क्लबमा उनले खेल्न सक्ने सम्भावना रहेको खेलकुद निर्देशक जेस्पर जान्सनले बताए ।

‘ यसको उत्तर मात्र ज्लाटनसँग छ । उनले यकिन यस्तै गर्ने भनेर भनेका छैनन् । मैले सोध्नुपर्छ भन्ने पनि होइन तर मलाई आशा छ उनले यहाँ खेल्नेछन् । उनलाई पनि थाहा छ हामीलाई उनको जरुरत छ,’ जान्सनले भने ।

मिलानसँगै अन्य क्लबहरुको पूर्ण प्रशिक्षण अर्को सोमबारदेखि सुरु हुँदैछ । हाल क्लबहरुले व्यक्तिगत रुपमा प्रशिक्षण सुचारु गरिरहेका छन् । इब्रा आफैंले पनि गत साता हाललाई मिलनसँग सम्झौता पूरा गरेर मात्र भविष्यबारे सोच्ने बताएका छन् ।