एजेन्सी – बार्सिलोनामा अपार सफलता हासिल गरेपछि युरोपका अन्य क्लबमा पनि लगातार उपाधि जितिरहेका प्रशिक्षक पेप गुआर्डीओलालाई बार्सिलोना फर्काउने पूर्व अध्यक्ष जोआन लापोर्टाले बताएका छन् ।

यसअघि आफ्नै कार्यकालमा लापोर्टाले गुआर्डीओलालाई क्लबको मुख्य प्रशिक्षकको जिम्मेवारी दिएका थिए । सन् २००३ देखि २०१० सम्म क्लबको अध्यक्ष रहेका लापोर्टाले क्लबमा निकै सफलता हासिल गरेका थिए । उनले पुन: क्लबको अध्यक्ष पदका लागि अर्को चुनावमा उठ्ने तयारी गरिरहेका छन् ।

गुआर्डीओलाले सन् २००८ देखि २०१२ को अन्तरमा बार्सिलोनालाई युरोपकै सर्वाधिक सफल क्लब बनाएका थिए । यसदौरान क्याटलान क्लबले ३ पटक ला लिगा र २ पटक च्याम्पियन्स लिग जित्दै कुल १४ ओटा उपाधि आफ्नो पोल्टामा पारेको थियो । क्लबले २ ओटा कोपा डेल रे तथा २ पटक क्लब विश्वकप उपाधि पनि जित्यो ।

सन् २०१२ मा बार्सिलोना छाडेपछि उनले जर्मन क्लब बायर्न म्युनिखमा जिम्मेवारी सम्हाले । त्यहाँ लगातार तीन पटक जर्मन बुन्डेसलिगा जितेपछि म्यानचेस्टर सिटीमा पनि उनले लय जारि राखे । प्रिमियर लिगमा उनले इतिहास रच्दै दुई पटक लिग उपाधि जितिसकेका छन् ।

लापोर्टाले सन् २००८ मा जोसे मोउरिन्हो उपलब्ध हुँदाहुँदै गुआर्डीओलालाई प्रशिक्षकको जिम्मेवारी दिएका थिए । त्यसबेला उनको निर्णयलाई लिएर खुब आलोचना पनि भएको थियो । तर गुआर्डीओलाले उनीमाथि राखेको विश्वासमा खरो उत्रंदै बेग्लै इतिहास रचे ।

लापोर्टाले अब आफू अध्यक्ष भएमा पुन: गुआर्डीओलालाई बार्सिलोना ल्याउने बताएका छन् । ‘ म गुआर्डीओलालाई फिर्ता बोलाउन चाहन्छु । अहिले उनि सिटीमा छन् र उनको निर्णयमा भर पर्छ । उनी बार्सिलोनाका पहिचान हुन् र धेरैले उनलाई फिर्ता चाहन्छन्,’ लापोर्टाले भने ।