एजेन्सी – विश्व प्रसिद्ध इंग्लिस प्रिमियर लिग सुचारु हुने तयारी भइरहेको बेलामा क्लब ब्राइटन होभ अल्वियोनका तेस्रो खेलाडीमा कोरोना संक्रमण पुष्टि भएको छ । क्लबका सिइओ पउल बार्वरले शनिबार गरिएको परिक्षणमा एक खेलाडीमा कोरोना संक्रमण पुष्टि भएको बताएको छ ।

नाम नखुलाइएका उक्त खेलाडी अब १४ दिने सेल्फ आइसोलेसनमा रहने छन् । ब्राइटनका अर्काे खेलाडीमा पनि कोरोना पुष्टि भएपछि स्थगित भएको इंग्लिस प्रिमियर लिग पुनः सुचारु हुनेमा आशंका पैदा भएको छ । यसअघि मार्च २६ र अप्रिल २ मा क्लबका दुई खेलाडीमा कोरोना भाइरस पोजेटिभ देखिएको थियो । क्लबका सिइओ पउल बार्वरले एक साताको अवधिमा सुरक्षित हुने उपाय अपनाइरहेको र सोही अनुरुप प्रशिक्षण थाल्नु अघि सबै खेलाडीको कोरोना परिक्षण गरिरहेको छ ।

लिग सुचारु र न्युट्रल भेन्युमा खेल्ने विषयमा प्रिमियर लिगका २० क्लबका सेयर होल्डरका सोमबार छलफल हुँदैछ । टिमहरुले १८ मे बाट प्रशिक्षणको सम्भावित हुने मिति हुन सक्ने आँकलन गरिएको छ । सिइओ बार्वरले त्यहाँ चिन्ता हुनु स्वाभविक रहेको र यि बाधा अड्चनका बीच पनि सुरक्षित र सकेसम्म जोखिम न्युनिकरण गर्ने कार्यमा अघि रहेको बताएका छन् । ब्राइटन अहिले प्रिमियर लिगको १५औं स्थानमा रहेको छ ।

प्रिमियर लिग १३ मार्चदेखि स्थगित भएको थियो । लिगमा यस सिजन ९२ खेल खेल्न बाँकी छ । यो सिजन लिभरपुल ३० वर्षपछि लिग उपाधिनजिक रहेको छ । लिभरपुल दोस्रो स्थानको म्यानचेस्टर सिटी भन्दा २५ अंकले अघि रहेको छ । लिभरपुलको ८२ अंक रहदा सिटीको ५७ अंक रहेको छ । अबको दुई खेलमा जित हात पारे लिभरपुल प्रिमियर लिग च्याम्पियन बन्नेछ ।