एजेन्सी – क्याटलान क्लब बार्सिलोनाको एकेडेमी ला मासियामा हुर्किएका युवा प्रतिभा मार्क जुराडो इंग्लिस क्लब म्यानचेस्टर युनाइटेड जाने भएका छन् । १६ वर्षीय जुराडोलाई म्यानचेस्टर युनाइटेडले आउदो समरमा अनुबन्ध गर्ने पक्का गरेको हो । 

बार्सिलोनाले युवा प्रतिभा जुराडोलाई क्लबमै बस्न आग्रह गरेपनि उनले युनाइटेड जाने निर्णय गरेको हो । पछिल्लो समय ला मासियामा हुर्किएका खेलाडीमध्ये जुराडोलाई निकै प्रतिभावान खेलाडी रुपमा हेरिएको छ । जुराडो अर्काे सिजनपछि नै युनाइटेडको युथ एकेडेमीमा रहने छन् । उनी त्यहाँ राडिक चिटेक र जोए हुगिललगायत अन्य खेलाडीको साथमा रहनेछन् ।

बार्सिलोनाले यसअघि नै ला मासियामा हुर्किएका स्टार खेलाडी जेरार्ड पिकेसँगै, सेस फाब्रिगास र हेक्टर बेलेरिनजस्ता खेलाडी इंग्लिस क्लबमा गुमाएको थियो । सन् २००४ मा ला मासियामै हुर्किएका जेरार्ड पिकेले १६ वर्षकै उमेरमा म्यानचेस्टर युनाइटेड रोजेका थिए । अहिले पिके बार्सिलोनाबाटै खेलिरहेका छन् । जुराडोले बार्सिलोना छाड्ने चर्चा भएसँगै क्लबका समर्थकहरुले उनलाई क्लबमै राख्न दवाव दिइरहेका छन् ।

बार्सिलोनाले जुराडोलाई अर्काे सिजनसँगै सिनियर टोलीमै स्थान दिने योजना बनाइरहेको थियो । पछिल्लो समय ला मसियाका खेलाडीभन्दा क्लबले ट्रान्सफर बजारबाट खेलाडी खरिद गर्दा युवा प्रतिभाहरु अन्यत्र जान थालेका छन् । जुराडोको कप्तानीमा बार्सिलोनाको युथ टोली जुभेनिल ‘बी’ डिभिजनमा बढुवा नजिक रहेको थियो । तर, कोरोनाको कारण अहिले यो स्थगित अवस्थामा छ ।