एजेन्सी – इटालियन क्लब युभेन्टसका मिडफिल्डर मिरालेम प्यानिच आउदो समरसँगै क्याटलान क्लब बार्सिलोना आउन सहमत भएका छन् । इटालियन सञ्चार माध्यमका अनुसार बोस्नियाका ३० वर्षीय मिडफिल्डर आउदो समरमा बार्सिलोना आउन सहमत भएको उल्लेख गरेको छ ।

बार्सिलोनाले यसअघि नै आर्थर मेलोको स्थानमा प्यानिच नै ल्याउने योजना बनाइरहेको थियो । बार्सिलोनाले प्यानिचलाई ६० मिलियन युरो खर्च गर्न सक्ने अनुमान गरिएको छ । प्यानिच बार्सिलोना आउन सहमत हुदा ब्राजिलका २३ वर्षीय आर्थर मेलोको बार्सिलोनामा भविष्य अनिश्चित बनेको छ ।

उनी युभेन्टस नै जान सक्ने आँकलन गरिएको छ । मेलोको पछिल्लो २ सिजनमा बार्सिलोनाका लागि ६७ खेल खेलेका छन् । उनको सम्झौता २०२४ सम्म रहेको छ । बार्सिलोनाले मेलोले युभेन्टस जान नचाहेको अवस्थामा आर्टुरो भिडाल र इभान राकिटिकलाई प्रस्ताव गर्न सक्नेछ ।

बार्सिलोनाले २०१६ मै प्यानिचलाई अनुबन्धको प्रयास गरेपनि लगातार तीन सिजनसम्म असफल भएको थियो । उनलाई अनुबन्ध गर्न असफल भएपछि बार्सिलोनाले २०१६ का आन्द्रे गोमेज, २०१७ मा पाउलिन्हो र २०१८ मा पिजानिक अनुबन्ध गरेको थियो । गोमेज र पाउलिन्होको तुलनामा आर्थर मेलोले विस्तारै आफ्नो प्रभाव छाड्न सफल भएका थिए ।

२०१६ मा इटालियन क्लब रोमाबाट युभेन्टस पुगेर अहिले चौथो सिजन बिताइरहेका प्यानिचले यो सिजन ३२ खेलमा ३ गोल र चार असिस्ट दिएका छन् । उनले युभेन्टसबाट विभिन्न ६ उपाधि जितेका छन् । जसमा तीनपटक सिरी ‘ए’ दुई इटालियन कप र एक सुपरकप छन् ।