एजेन्सी – फुटबल सुचारु गर्ने लक्ष्यसहित स्पेनिस लिगको खेलाडीहरुमा गरिएको कोरोना परिक्षणमा पाँच खेलाडीलाई कोरोना संक्रमण देखिएको छ । आरएसी१ का अनुसार ला लिगाका ३ र दोस्रो श्रेणी लिगका २ खेलाडीमा संक्रमण पक्का भएको हो ।

लिगले हाललाई कुन खेलाडीलाई कोरोना परिक्षण गर्दा पोजिटिभ देखिएको भन्ने खुलाएको छैन । तर खेलाडीमा नै संक्रमण देखिएपछि लिग चाडै सुचारु हुने सम्भावना भने केहि कम भएको छ । अझै पनि केहि टोलीहरुको कोरोना परिक्षण बाँकी रहेको अवस्थामा ला लिगाले सबै परिक्षण सकिएपछि मात्र विज्ञप्ति जारि गर्नेछ ।

आरएसी१ ले खेलाडीको नाम सार्वजनिक नगरेपनि बार्सिलोनाका कुनै खेलाडीलाई कोरोना संक्रमण नभएको भने पक्का गरेको छ । बार्सिलोनाका खेलाडीहरु सबैको परिक्षण नेगेटिभ आएपछि क्लबले शुक्रबारदेखि प्रशिक्षण थाल्ने कार्यक्रम रहेको छ । सुरुवाती चरणमा खेलाडीहरुले व्यक्तिगत प्रशिक्षण मात्र गर्नेछन् । यसअघि भ्यालेन्सियाका पाँच खेलाडीमा संक्रमण देखिएपनि उनीहरु ठिक भइसकेका छन् ।

ला लिगाले खेलाडीसँगै प्रशिक्षण टोली र खेलाडीसँग सम्पर्कमा आउने हरेक अफिसियलको कोरोना परिक्षण गर्नेछ । बन्द मैदानमा लिग खेलाउनका लागि पनि लिगमा आबद्ध सबै कोरोना मुक्त हुनु जरुरि छ । सरकारले त्यसपछि मात्र खेल आयोजनाका लागि स्वीकृति दिनेबारे निर्णय गर्नेछ ।