एजेन्सी – दक्षिण कोरियाका फरवार्ड तथा इंग्लिस क्लब टोटेनहम हट्स्परका खेलाडी ह्युङ मिन सनले आफ्नो सैन्य तालिम सफलतापूर्वक पूरा गरेका छन् ।

झन्डै ३ साता लामो अनिवार्य सैन्य तालिममा सहभागी सन तालिम लिने उत्कृष्ट ५ सहभागीमा पर्न सफल भएका हुन् । कुल १ सय ५७ सहभागी रहेको क्याम्पमा सनले सुटिङ विधामा उत्कृष्ट नतिजा समेत हासिल गरे । कोरियाको दक्षिणी भेगको जेजुस्थित म्यारिन कर्प्स ट्रेनिङ क्याम्पमा भएको तालिमका लागि सन लन्डनबाट आएका थिए । कोरोना भाइरस संक्रमणका कारण समापन समारोह सार्वजनिक रुपमा गरिएको थिएन ।

कोरियामा हरेक नागरिकले २१ महिने सैन्य तालिम अनिवार्य रुपमा लिनुपर्ने प्रावधान छ । तर सनले सन् २०१८ को एसियाली खेलकुदमा देशका लागि स्वर्ण पदक जितेपछि उनको तालिम अवधि घटाइएको थियो । अब सनले सन् २०२३ सम्म सिमित सामाजिक कार्यहरुमा सहभागिता जनाउनु पर्नेछ ।

प्रिमियर लिग कोरोना संक्रमणका कारण स्थगित भएपछि सन कोरिया प्रस्थान गरेका थिए । उनी अब अर्को महिना लन्डन फर्कने अपेक्षा गरिएको छ । हाल टोटेनहमले समुहगत रुपमा प्रशिक्षण गरिरहेको छ । लिग सुचारु हुने विषयमा भने हालसम्म कुनै निर्णय भएको छैन ।