एजेन्सी – सर एलेक्स फर्गुसन विश्वको क्लब फुटबल जगतका सर्वाधिक सफल प्रशिक्षकमा गनिन्छन् । म्यानचेस्टर युनाइटेडमा साढे दुई दशक भन्दा बढी बिताएका फर्गुसनले क्लब स्तरमा जित्न बाँकी सायदै कुनै उपाधि होला ।

सन् २०१३ मा आश्चर्यजनक रुपमा सन्न्यास लिएका फर्गुसनले आफ्नो ठूलो योजना सफल हुन नसक्दा खेलबाट टाढा हुन पुगेको खुलासा भएको छ । युनाइटेडका पूर्व खेलाडी प्याट्रिस एभ्राले एक अन्तर्वार्ताका क्रममा फर्गुसनको महत्त्वाकांक्षी योजना र त्यसको नतिजाका बारेमा बताएका छन् । एभ्राका अनुसार फर्गुसनले त्यस सिजनको अन्त्यतिर एक्कासी अब फुटबलबाट टाढा हुने निर्णय लिँदा सबैजसो आश्चर्यमा परेको बताए ।

एभ्राका अनुसार फर्गुसन आफ्नो करीअरको अन्त्य च्याम्पियन्स लिग उपाधि जितेर गर्न चाहन्थे । जसका लागि उनले क्रिस्टियानो रोनाल्डो र ग्यारेथ बेललाई अनुबन्ध गर्दै विश्वकै सर्वोत्कृष्ट टोली खडा गर्न चाहन्थे । सिजन अन्त्य निजिकिंदै जाँदा फर्गुसनले आफ्नो योजनालाई कार्यान्वयन गर्न खोजे ।

रोनाल्डोलाई युनाइटेड फर्काउने प्रयासमा रियल म्याड्रिडको अगाडी उनको केहि लागेन । र योजना असफल भएको दुई साताभित्र नै उनले फुटबल छाड्ने निर्णय गरिसकेका थिए । यता टोटेनहममा त्यस समय चर्चा कमाइरहेका बेललाई पनि अध्यक्ष ड्यानीएल लेभीले इंग्लिस टोलीमा नबेच्ने भनेपछि फर्गुसन निराश भएका थिए ।

एभ्राले फर्गुसनको योजनामा मुख्य रुपमा रोनाल्डो र बेल रहेको बताए । ‘ फर्गुसनले मलाई आफू अहिले नै सन्न्यास नलिने बताएका थिए । उनले रोनाल्डो र बेललाई टोलीमा समेट्न सकेको खण्डमा ९९ प्रतिशत पक्का च्याम्पियन्स लिग जित्न सक्ने बताएका थिए । तर रोनाल्डोले त्यसबेला युनाइटेड फर्कने इच्छा देखाएपनि रियलले उनलाई जान दिएन,’ एभ्राले सुनाए ।

फर्गुसनले आफ्नो योजना सफल नभएपछि २७ वर्ष प्रशिक्षण गरेको क्लब प्रिमियर लिग उपाधिसहित अन्त्य गरेका थिए । उनले च्याम्पियन्स लिग जित्ने आफ्नो धोको भने पूरा गर्न सकेनन् । रोनाल्डोसँगै बेल त्यसपछि रियल म्याड्रिडमा गएर च्याम्पियन्स लिगमा वर्चस्व जमाउन सफल भएका थिए ।