रुस्लान थ्री स्टार क्लब २०७१ सालको राष्ट्रिय लिगको विजेता भएको हकमा नेपालको प्रतिनिधित्व गर्दै यहि अगष्ट २१ गतेबाट मंगोलियामा सुरु हुन गइरहेको ए.एफ.सी कपको प्लेअफ छनोटमा सहभागी हुन लागेको छ। यसै क्रममा टोलीले विगत तिन सातायता नियमित प्रशिक्षण गरिरहेको छ।

टोलीको प्रमुख प्रशिक्षकमा मेघराज केसीलाइ नियुक्त गरिएको छ भने प्रशिक्षकमा रबिन्द्र शिलाकार रहनेछन्। नेपालको प्रतिनिधित्व गर्दै ए.एफ.सी. कप खेल्ने रुस्लान थ्री स्टार क्लब नै पहिलो टोलि हो।

ए.एफ.सी कपका लागि क्लबले २० खेलाडिहरुलाई अनुबन्धित पनि गरिसकेको छ।

खेलाडीको नामावली यसप्रकार छन्: एलेन न्यौपाने, बिनय श्रेष्ठ, अविशेक बराल (गोलरक्षक) | रञ्‍जित धिमाल, देवेन्द्र तामाङ, पिटर सेगुन, विजय धिमाल, सरोज दाहाल, विष्णु सुनार (डिफेन्डर) | बिक्रम लामा, निराजन खड्का, प्रकाश बुढाथोकी, सुनिल बल, विजय गुरुङ, विष्णु गुरुङ (मिडफिल्डर) | बुद्ध राज लिम्बु (चेम्जोङ), असिम जंग कार्की, रोशन मल, मार्टिन्स कायोडे अजायी, सुसान श्रेष्ठ (फरवार्ड) रहेका छन्। क्लबमा दुइ विदेशी खेलाडीमा नाइजेरियाका पिटर सेगुन र मार्टिन्स कायोडे अजायी रहेका छन्।

प्रतियोगितामा थ्री स्टार क्लब समूह ‘बि’मा परेको छ। थ्री स्टार संगै समूहमा आयोजक मंगोलियाको एर्चिम फुटबल क्लब र कम्बोडियाको नागावोर्ल्ड फुटबल क्लब रहेका छन्। थ्री स्टारले अगष्ट २१ तारिखमा आयोजक एर्चिमको सामना गर्नेछ भने अगष्ट २३मा नागावोर्ल्डसंग खेल्नेछ। तिन समुहमा विभाजन गरिएको प्लेअफ छनोट चरणमा नौ टोलीको सहभागिता रहेको छ। तिनै समुहबाट समूह विजेता अर्को चरणमा पुग्नेछ।

यस प्रतियोगिताको तयारीको लागि रुस्लान थ्री स्टार क्लब र नेपाल ए.पी.एफ क्लब आगामी साउन २१ गते दिनको ४:०० बजे एन्फा कम्प्लेक्स सातदोबाटोमा मैत्रीपूर्ण खेल खेल्दैछन। खेलको लागि टिकट दर रु.५०० र रु.२०० तोकिएको छ। टिकट खेल हुने दिन दिनको १ बजेबाट खेलस्थलमै खरिद गर्न सकिनेछ।