एजेन्सी – अर्जेन्टिनाका यू २० र ओलम्पिक टोलीका प्रशिक्षक फर्नान्डो बाटिस्टाले बार्सिलोनामा फरवार्ड लुइस स्वारेज र लाउटारो मार्टिनेज कुनै समस्याविना सँगै खेल्न सक्ने विश्वास व्यक्त गरेका छन् । इन्टर मिलानका फरवार्ड मार्टिनेज नयाँ सिजनमा क्याम्प नोउ जाने चर्चा चलिरहेका बीच बाटिस्टाको यस्तो भनाई सर्वजनिक भएको हो ।

स्वारेजकै विकल्पका रुपमा बार्सिलोनाले मार्टिनेजलाई लामो समयका लागि क्लबमा भित्राउने चर्चा चलिरहेको छ । स्वारेज अब केहि वर्षमात्र बार्सिलोनामा रहने सम्भावना रहेकोले विकल्पका बारेमा सोचिरहेको छ । बाटिस्टा २२ वर्षे मार्टिनेजको खेल शैलीका बारेमा जानकार छन् । स्वारेज र मार्टिनेज हुँदा स्पेनिस च्याम्पियन बार्सिलोनामा लियोनल मेस्सीलाई राम्रो साथ मिल्ने बताएका छन् ।

‘यदि ४–३–३ को रणनीतिमा खेल्ने हो भने त्यहाँ दुई मध्ये एकका लागि मात्र ठाँउ रहन्छ । यदि दुवै खेल्ने पाए भने त्यसले टोलीलाई फाइदा पुग्ने छ ,’ उनले भने, ‘अहिले मेस्सीले तल झरेर खेल्ने गरेका छन् । ३ जना खेलेको खण्डमा मेस्सीलाई पनि सहज हुनेछ । विकल्प धेरै हुनेछ । त्यसैले मलाई लाग्छ स्वारेज र मार्टिनेजसँगै खेल्न सक्छन् ।’

बाटिस्टाले अहिले इन्टर पनि त्यस्तै रणनीतिमा खेलिरहको बाटिस्टाले सुनाए । ‘मलाई लाग्छ स्वारेज र मार्टिनेजसँगै खेल्दा कुनै समस्या हुने छैन । अहिले इन्टरमा पनि त्यस्तै छ’, प्रशिक्षकले भने, ‘लुकाकुसँग खेल्दा मार्टिनेजलाई कुनै समस्या छैन । दुवै उस्तै क्षमताका छन् । एक जना मिडफिल्डमा जाँदा अर्कोले अर्को ठाँउ हेर्न सक्छन् । ओभरल्यापमा जादैनन् ।’

‘विश्व फुटबलमा अहिलेका उत्कृष्ट युवा फरवार्ड मध्ये मार्टिनेज एक हो । अहिले बार्सिलोनाले उनीमाथि चासो राखेको छ । कोरोना भाइरसका कारण उत्पन्न आर्थिक कठिनाईका कारण बार्सिलोनाले उनलाई ल्याउन सक्छ सक्दैन भने हेर्न बाँकी छ,’ बाटिस्टाले भने ।