एजेन्सी – पोर्चुगिज तथा इटालियन क्लब युभेन्टस क्रिस्टियानो रोनाल्डो स्पेनमै रोकिएका छन् । रोनाल्डो आफ्नो निजि विमानबाट इटली जाने प्रयास गरेपनि उनी म्याड्रिडमा रोकिएका हुन् ।

इटली सरकारले सिरी ‘ए’ क्लवलाई प्रशिक्षणमा फर्कनका लागि स्वीकृति दिएपछि इटालियन सिरी ‘ए’ क्लवले सबै खेलाडीलाई टुरिन फर्किन निर्देशन दिएको थियो । सोही अनुरुप रोनाल्डो आइतबार पोर्चुगलको मडेरियाबाट इटली फर्कदा स्पेनमा रोकिएका हुन् ।

यससँगै रोनाल्डो पोर्चुगल फर्कने तथा उनको १८ जना क्षमताको ३० मिलियन पाउन्डको निजी विमान म्याड्रिडमा रहनेछ । स्पेन सरकारले हवाई यात्रालगायतमा प्रतिबन्ध लगाएकार कारण इटली जान नपाएका हुन् । रोनाल्डोले म्याड्रिडबाट तीनपटक इटली जाने प्रयास गरेपनि त्यहाँको विमानस्थलले स्वीकृति नदिँदा उनी त्यहीँ रोकिन बाध्य बनेका हुन् । यससँगै रोनाल्डोले इटली पुग्न केही दिन कुर्नुपर्ने भएको छ ।

त्यहाँको विमानस्थलले अर्काे साताको सोमबार मात्र उड्न पाउने बताएको छ । अब रोनाल्डो सोमबार मात्रै इटली पुग्नेछन । रोनाल्डोले आइतबार मात्रै मदर्स डेको अवसरमा आफ्नी आमालाई शुभकामनासहित मर्सिडिज कार उपहार दिएका थिए । सामाजिक सन्जालमा निकै सक्रिय रहने रोनाल्डोले लकडाउनको अवसरमा मडेरियामा रहेर आफुले गर्ने क्रियाकलापको तस्वीरहरु नियमित रुपमा पोस्ट गर्दे आएका छन् ।

सिरी ‘ए’ को शीर्षस्थानमा रहेको युभेन्टसले सोमबारदेखि प्रशिक्षण थाल्ने घोषणा गरेको थियो । रोनाल्डो टुरिन पुगेपनि थप १४ दिने क्वारेन्टिनमा बस्नुपर्ने थियो । बोलोग्ना, पार्मा र रोमाले भने प्रशिक्षण शुरु गरिसकेका छन् ।

इटलीमा १८ मे सम्म खेलकुद गतिविध गर्न प्रतिबन्ध रहेको छ । क्लबहरुले प्रशिक्षण थालेपनि सिरी ‘ए’ सुचारु हुने मिति तोकिएको छैन ।