एजेन्सी – ब्राजिली स्टार लेफ्ट ब्याक मार्सेलोले स्पेनिस क्लब रियल म्याड्रिड छाड्ने कुनै योजना नरहेको बताएका छन् । रियलका भेट्रान मार्सेलो पछिल्लो समय आफ्नो पूर्व सहकर्मी क्रिस्टियानो रोनाल्डो रहेको इटालियन क्लब युभेन्टस जान सक्ने चर्चा चलेको थियो ।

विश्वका उत्कृष्ट लेफ्ट ब्याकमध्येको एक मार्सेलोले रियलमा हाल सबैभन्दा लामो समय क्लबमा रहने दोस्रो खेलाडी हुन् । उनीभन्दा अघि क्लबका हालका कप्तान सर्जियो रामोस मात्रै रहेका छन् । मार्सेलोले रियलमा १३ वर्ष बिताइसकेका छन् । मार्सेलो २००७ मा ब्राजिली क्लब फ्लुमिनेन्सबाट ५ मिलियन पाउन्डमा रियलका आएका थिए । त्यसयता, मार्सेलो रियललको महत्वपुर्ण खेलाडीको रुपमा रहँदै आएका छन् ।

‘मैले दुई वर्ष अघि नै सुनेको थिए कि मार्सेलो रोनाल्डोलाई पछ्याउँदै युभेन्टस पुग्नेछन् । त्यसमा मार्सेलो राजी भइसकेको छ,’ मार्सेलोले इटलीका आइकन फावियो कानाभारोको इन्स्टाग्राम लाइभमा भने, ‘यि अफवाहहरु बनाउँदा मानिसहरु रमाउछन् । म क्लब छोड्ने मनासयमा छैन । यो कुरामा म विश्वास पनि गर्दिन र रियलले पनि मलाई कतै जान दिने छैन । म अझै म्याड्रिडमा एकदमै खुसी छु ।’

मार्सेलोले रियलमा अझै धेरै गर्न बाँकी रहेको बताएका छन् । मार्सेलोले रियलमा १३ वर्षको बसाईमा समान चार च्याम्पियन्स लिग, स्पेनिस ला लिगा, फिफा क्लब विश्वकप र सुपर कोपा जितेका छन् । तीनपटक युइएफए सुपर कप र दुई पटक कोपा डेल रे जितेका छन् ।

३१ वर्षीय मार्सेलोले रियलमै रहने बताएपनि उनले अब रियलको पहिलो रोजाईमा पर्न फरल्यान्ड मेन्डीसँग प्रतिस्पर्धा गर्नुपर्ने हुन्छ । यसै समरमा फ्रेन्च क्लब लियोनबाट आएका मेन्डीले निकै उत्कृष्ट प्रदर्शन गरिरहेका छन् । मार्सेलोले यो सिजन चोटसँग जुध्नुपर्दा २४ वर्षीय मेन्डीले अवसर पाएका थिए । उनले प्रशिक्षक जिदानको मन जितिरहेका छन् ।

कोभिड १९ का कारण स्पेनिस ला लिगासहित विश्वको खेलकुद गतिविध ठप्प छन् । रोकिएको लिग शुरु हुने या नहुने अन्योलता रहेपनि मार्सेलोले रोकिएको सिजन शुरु भएर सकिनेमा विश्वस्त रहेको बताएका छन् । रियल ला लिगामा दोस्रो स्थानमा रहेको छ । शीर्षस्थानको बार्सिलोनाको ५८ तथा रियलको ५६ अंक छ ।