एजेन्सी – लाखौं दर्शकका बीच लियोनल मेस्सी पहिलो पटक ठूलो स्क्रिनमा देखिएका थिए । त्यो महत्त्वपूर्ण गोलका कारण मेस्सीलाई ठूलो स्क्रिनमा  देखाईको थियो । त्यो अल्बासेटविरुद्धको गोल थियो । ठिक १५ वर्ष अघि । २००५ मे १ मा मेस्सीले त्यो गोल गरेका थिए ।

त्यति बेला मेस्सी १७ वर्षका थिए । युवा ती खेलाडीका बारेमा सबैले थाहा पाउन थालिसकेको थिए । उनले बार्सिलोनाका लागि जे पनि गर्न सक्छन् भन्ने चर्चा थियो । यो डेढ दशकको यात्रामा उनी विश्वका सर्वकालिन महान खेलाडी हुन सक्छन् भन्ने विषयमा चर्चा सुरु भएको छ । अहिले उनकै बारेमा चर्चा हुन्छ ।

मेस्सीका बारेमा अनुमान गरे जस्तै उनी क्लबको एउटा हिस्सा बनेका छन् । टोलीका अधिकांश सफलतामा उनकै भूमिका महत्त्वपूर्ण रहने गरेको छ । त्यो पहिलो दिन अल्बासेटविरुद्ध पनि उनले त्यस्तै प्रभाव जमाएका थिए । ३० नम्बर जर्सी बाट बार्सिलोनाको माथिल्लो क्लबको यात्रा सुरु गरेका मेस्सी  अहिले टोलीको १० नम्बर जर्सीका खेलाडी हुन् । अर्जेन्टिनी युवा खेलाडी ८७ औं मिनेटमा सामुइल इटोको ठाँउमा प्रवेश गरेका थिए ।

बार्सिलोनाका तत्कालिन प्रशिक्षक फ्रान्क रायकार्डले क्यामरुनी फरवार्डको ठाँउमा मेस्सीलाई मैदान पठाएका थिए । त्यति बेला सर्वाधिक गोलकर्तालाई दिइने पिचिची ट्रफीको दौडमा रहेका इटो प्रशिक्षकले परिवर्तन गर्दा रिसाएका थिए । तर खेलको ९० औं मिनेटमा मेस्सीले गोल गरे । उनले रोनाल्डिन्होको पासमा गोलरक्षकलाई चिप गर्दै जित पक्का गरेका थिए । त्यो गोलले टोली घरेलु उपाधिको नजिक पुगेको थियो । लिगमा गोलको खाता खोलेका मेस्सीले त्यसयता सयौं गोल गरेका छन् ।

त्यो गोल बार्सिलोनाको इतिहासमा मात्र होइन, राष्ट्रिय फिल्म लाइब्रेरीमा पनि सधैभरका लागि राखिएको छ । संयोगवश त्यहि खेलमा अल्बर्ट एस्पिनोजाले ‘योर लाइफ इन ६५ मिनेट्स‘ अर्थात् ‘६५ मिनेटमा तपाईंको जिन्दगि’ नामक फिल्मका लागि क्याम्प नोउमा सुट गरिरहेका थिए । कमैले आँकलन गरेका थिए की यो त्यहि खेल हुनेछ जसमा क्लबका सर्वकालीन महान खेलाडीले गोलको खाता खोल्नेछन् ।

मेस्सीले त्यो दिन गरेको प्रदर्शनको भिडियो :