एजेन्सी – ब्राजिली स्टार मिडफिल्डर अर्थर मेलोले लामो समय क्याटलान क्लब बार्सिलोनामै बस्ने इच्छा रहेको स्पष्ट पारेका छन् । क्लबले आफूलाई बेच्ने तयारी गरिरहेको चर्चा चुलिएपछि मेलोले बार्सिलोना छाड्ने पक्षमा नरहेको र लामो समय बार्सिलोनामै बस्न चाहेका बताएका हुन् ।

बार्सिलोनाका लेजेन्ड जाभी हर्नान्डेजको उत्तराधिकारीको रुपमा हेरिएको २३ वर्षीय मेलोलाई बार्सिलोनाले आगामी समरमा बेच्ने चर्चा चलेको छ । उनको सट्टामा इटालियन क्लब युभेन्टसका मिडफिल्डर मिरोलेम प्यानिचलाई अनुबन्ध गर्ने तयारी थालेको स्पेनमा विभिन्न सञ्चार माध्यमले जनाएका  थिए । प्ले मेकर मेलोले बार्सिलोनाका लागि हालसम्म ६७ खेलमा ४ गोल गरेका छन् ।

मेलोले सरुवा बजारमा चर्चा चल्नु र अन्य क्लबहरुले पनि चासो दिनु स्वभाविक रहेपनि यसबारे आफुलाई केही थाहा नरहेको बताएका छन् । मेलो २०१८ मा ब्राजिली क्लब ग्रेमियोबाट ३१ मिलियन पाउन्डमा ६ वर्षको लागि बार्सिलोना आएका थिए । बार्सिलोनामा आएलगत्तै उनले आफ्नो छाप छोड्न सफल भएको र अहिले टोलीका मुख्य खेलाडीको रुपमा रहेका छन् ।

आफ्नो सरुवा एकाएक चुलिएपछि आर्थरले बार्सिलोना छोड्ने कुनै मनासय नरहेको बताएका छन् । ‘बजारमा यस्ता चर्चा र अनुमान चल्नु स्वभाविक नै हो । यो नयाँ कुरा होइन । इमान्दारिताका साथ भन्नुपर्दा म बार्सिलोनामै लामो समय रहन चहान्छु,’ मेलोले भने, ‘म मेरो विचारमा स्पष्ट छु । मेरो अहिलेको लक्ष्य भनेको टोलीको प्रमुख हिस्सा बन्नु र टिमलाई धेरै भन्दा धेरै योगदान दिनु हो ।’