एजेन्सी – क्याटलान क्लब बार्सिलोनाले फरवार्ड लोउटारो मार्टिनेज अनुबन्धको लागि लामो कसरत गरेपछि इटालियन क्लब इन्टर मिलानले बार्सिलोनासमक्ष दुई खेलाडी माग गरेको छ ।

इन्टर मिलानले अर्जेन्टिनी फरवार्ड मार्टिनेज दिने शर्तमा आर्टुरो भिडाललाई स्थायी रुपमा तथा र एन्टोइन ग्रिजमनलाई लोनमा माग गरेको हो । फ्रेन्च फरवार्ड ग्रिजमन यसै सिजनमा स्पेनिस क्लब एट्लेटिको मड्रिडबाट १०७ मिलियन पाउन्डमा बार्सिलोना पुगेका थिए ।

मार्टिनेजको नाम लगातार रुपमा नोउ क्याम्पसँग जोडिएको छ । इन्टरले मार्टिनेजको मुल्य ९६ मिलियन पाउन्ड राखेको छ । बार्सिलोना मार्टिनेज अनुबन्ध गर्न इच्छुक रहेको छ । यद्दपि इन्टरले मार्टिनेजको लागि बार्सिलोनालाई दुई खेलाडी माग गरेको हो ।

बार्सिलोनाका प्रशिक्षक क्विके सेटिन टोलीको अग्रपङ्ति बलियो बनाउन ग्रिजमन बेचेरै भएपनि मार्टिनेज भित्र्याउने योजनामा छन् । फरवार्ड लुइस सुआरेज र औसमाने डेम्बेले चोटसँग जुधिरहेका कारण पनि बार्सिलोना फरवार्डको खोजीमा रहेको छ । मार्टिनेजले पनि आफ्नो अर्जेन्टिनी सहयात्री तथा कप्तान लियोनेल मेस्सीसँग क्लब फुटबलमा पनि सँगै खेल्ने चाहना राखेका छन् । त्यसैले पनि मार्टिनेज बार्सिलोनामा अनुबन्ध हुन सक्नेछ ।

बार्सिलोनाले यो सिजन मध्यम प्रदर्शन गरिरहेपनि स्पेनिस ला लिगाको शीर्षस्थानमा रहेको छ । बार्सिलोनाले रियल म्याड्रिडलाई २ अंकले पछि पारेको छ । तर, अहिले कोरोना भाइरस (कोभिड–१९) का कारण स्पेनिस ला लिगा स्थगित छ । ३२ वर्षे आर्टुरो भिडाल २०१८ मा जर्मन क्लब बायर्न म्युनिखबाट बार्सिलोना आएका थिए । उनले यो सिजन बार्सिलोनाको पहिलो रोजाईमा स्थान पाइरहेका छन् । उनले यो सिजन ३१ खेल खेलेका छन् ।

इन्टर मिलानमा २२ वर्षे मार्टिनेजको सम्झौता २०२३ सम्म रहेको छ । मार्टिनेज २०१८ मा अर्जेन्टिनी क्लब रेसिङबाट १९ मिलियन पाउन्डमा इन्टर मिलान पुगेका थिए ।