एजेन्सी – फ्रेन्च लिग (एलएफपी) ले शीर्षस्थानमा रहेको पेरिस सेन्ट जर्मेन (पीएसजी) लाई फ्रेन्च लिग वानको च्याम्पियन घोषणा गरेको छ । एलएफपीले अंक र खेलको आधारमा पीएसजीलाई च्याम्पियन घोषणा गरेको हो । 

कोरोना भाइरस (कोभिड–१९) को महामारीका कारण सिजनको १० खेल बाँकी रहेको थियो । तर, फ्रान्सका प्रधानमन्त्री एडुवार्ड फिलिपले मगंलबार आउदो सेप्टेम्वरसम्म खेलकुदका कुनै गतिविधि नगर्न निर्देशन दिएपछि सिजन रद्ध गरिएको थियो ।

लिग वानमा १० चरणको खेल बाँकी रहँदा पीएसजीले दोस्रो स्थानको मार्सेलीलाई १२ अंकले पछि पारेको थियो । पीएसजीको २७ खेलबाट ६८ अंक रहेको छ । दोस्रो स्थानको मार्सेलीको २८ खेलबाट ५६ अंक छ । यससँगै पीएसजी पछिल्लो पछिल्लो आठ सिजनमा सातौंपटक  फ्रेन्च लिग वान च्याम्पियन बन्न सफल भएको छ । पीएसजी लगातार तेस्रो सिजन लिग वान च्याम्पियन बन्न सफल भएको हो ।

गत मार्च ७ र ८ मा लिग वानको २७औं र २८औं चरणको खेल खेलाइएको थियो । त्यो अवस्थासम्म पीएसजीले १२ अंकको स्पष्ट अग्रता लिएको थियो । फ्रेन्च लिग (एलएफपी) का प्रमुख कार्यकारी डिडिएर क्विलटले पीएसजीलाई उपाधि सुम्पिने विषयमा अपिल हुन सक्ने बताएपनि यो निर्णय सही भएको बताएका छन् ।

पीएसजी, मार्सेली र रेनिस अर्काे सिजनको लागि च्याम्पियन्स लिगलाई छनोट भएको छ । रेनिसले च्याम्पियन्स लिगको छनोट चरणको खेल खेल्नेछ । लिल, रेइम्स र नाइसमध्ये एकले युरोपा लिग खेल्ने छ । क्विलटले युरोपियन फुटबलको सर्वाेच्च निकाय (युइएफए) लाई २५ मे सम्ममा च्याम्पियन्स लिग र युरोपा लिग खेल्न योग्य टोलीको छिनोफानो गर्ने बताएका छन् । युइएफएले २५ मे सम्ममा सम्पुर्ण घरेलु लिगको हुने नहुने अवस्थाका बारेका जानकारी गराउन समयसीमा दिएको थियो ।

यस्तै एफसी लोरेन्ट फ्रेन्च लिग टु च्याम्पियन बन्दै शीर्ष डिभिजनमा बढुवा हुदा आरसी लेन्स पनि लिग वानमा बढुवा भएको छ । एलएफपीको यो निर्णयले भने एइमेन्स र टोलुसो भने मारमा परेको छ । दुवै टोली १० खेल बाँकी छदै दोस्रो डिभिजनमा घटुवा हुने भएको छ ।

रेलिगेसन जोनमै रहेको निम्सको भने शीर्ष डिभिजनमै रहने सम्भावना रहेको छ । लिग टु मा प्ले अफ नरहेकाले निम्स शीर्ष डिभिजनमै रहन सक्नेछ ।