एजेन्सी – कोरोना भाइरस (कोभिड-१९) संक्रमणका कारण ठप्प रहेको फुटबल गतिविधि पुन: संचालनमा ल्याउनका लागि आफू संक्रमणको खतरा भएपनि त्यसलाई सामना गर्न तयार रहेको बार्सिलोनाका मिडफिल्डर इभान राकीटिचले बताएका छन् ।

इभानले समाजलाई अहिले झनै एकताको सुत्रमा बाँध्न जरुरि रहेको भन्दै लिग सुचारु गर्नका लागि आफ्नो तर्फबाट आवश्यक परेको भूमिका खेल्न तयार रहेको उनले मार्सासँग बताए । ‘ मलाई फुटबल खेल्नु छ । हामीले आवश्यक सावधानी अपनाएर खेलकुद सुचारु गर्ने हो भने समर्थकहरुलाई केहि सहज हुन्छ,’ उनले भने ।

‘अहिलेको अवस्थामा अति आवश्यक सेवाहरु पनि सुचारु छन् । अहिले फुटबल पैसाको लागि भन्दापनि सार्वजनिक रुपमा सबैको हितका लागि आवश्यक छ । समर्थकहरुलाई यो समयमा फुटबल दिनु हाम्रो कर्तव्य हो भन्ने मेरो विचार छ । हामीले ऋण तिर्ने बेला आएको मैले महसुस गरेको छु,’ उनले भने ।

इभानले भाइरसबाट बच्न उचित प्रावधान लिएर मात्र फुटबल फर्कनुपर्ने पनि औंल्याए । ‘हामीले उचित व्यवस्था मिलाएर फुटबल फिर्ता गर्न सक्यौं भने यस खेलप्रति अझ सद्भाव बढ्नेछ । हामीले अहिले आर्थिक अवस्था, प्रतियोगिताको अवस्था, खेल तालिका, रेलिगेसन, बढुवा मात्र सुनेका छौं । तर कति मान्छे छन् जसले क्लबलाई निकै माया गर्छन् । यो बेलामा क्लबले पनि ति समर्थकको माया तिर्नुपर्छ,’ उनले भने ।

ला लिगामा बार्सिलोना अंक तालिकाको शीर्षस्थानमा छ । लिगका ११ चरणका खेल बाँकी रहँदा बार्सिलोना रियल म्याड्रिडभन्दा २ अंकले अगाडी छ । लिग सुचारु हुने विषयमा हालसम्म कुनै निर्णय भएको छैन । फ्रान्स, नेदरल्यान्ड्स, बेल्जियम लगायत केहि देशमा भने सिजन रद्द गरिएको छ ।