एजेन्सी – कोरोना भाइरस संक्रमणका कारण विश्वभर खेलकुद ठप्प छ । कतिपय लिगहरु सुचारु गर्ने तयारी चल्दैछ भने केहि लिगहरु रद्द समेत भइसकेका छन् ।

बेल्जियम, फ्रान्स र नेदरल्यान्ड्सका लिगहरु रद्द हुँदा जर्मनीमा भने प्रशिक्षण सुचारु हुन थालेको छ । स्पेन र इंग्ल्यान्डमा पनि अब पूर्ण प्रशिक्षण सुचारु गर्न तयारी थालिएको छ । इटालीको हकमा पनि चाडै निर्णय आउँदैछ । यसबीचमा विश्वभरका फुटबल खेलाडीहरुको संघ फिफप्रोका अनुसार खेलाडीहरु अहिले नै मैदान फर्कन तयार भने छैनन् ।

फिफप्रोका महासचिव जोनास हफम्यानका अनुसार पूर्ण रुपमा सुरक्षित नभएसम्म खेलाडीहरु मैदान फर्कन चाहदैनन् । ‘ खेलाडीहरुमा अझैपनि रोग सर्ने हो की भन्ने चिन्ता छ । यदि आफूलाई संक्रमण भयो भने परिवारमा पनि सर्छ भने डर उनीहरुलाई छ,’ हफम्यानले भने ।

‘खेलाडीहरु अहिले नै मैदान फर्कंदा आम जनमानसमा पनि राम्रो सन्देश जाँदैन । अहिलेको अवस्थामा मैदान फर्कनु भन्दापनि यो समस्याबाट मुक्त हुनुमा ध्यान दिनुपर्छ,’ उनले भने, ‘ अहिले हतारमा सुचारु गरेर समस्या आयो भने अझै लामो समय हामीले बाहिर रहनुपर्छ । त्यसैले निर्णय लिनुअघि निकै सोच्नु आवश्यक छ ।’

हालसम्म विश्वभर ३२ लाख मानिसमा कोरोना भाइरस (कोभिड-१९) संक्रमण देखिएको छ । जसमध्य २ लाख २० हजारले ज्यान गुमाएका छन् भने १० लाख भन्दा बढी ठिक भइसकेका छन् ।