एजेन्सी – अर्जेन्टिना तथा स्पेनिस क्लब बार्सिलोनाका कप्तान लियोनेल मेस्सी आधुनिक फुटबलका हस्ती हुन् । उनले आफ्नो खेल करियरमा क्लब फुटबलमा जित्न बाँकी केहि छैन । 

क्लब फुटबलमा जति सफलता पाएपनि आफ्नो राष्ट्रका लागि उल्लेख्य केही जित्न सकेका छैनन् । त्यसैले अर्जेन्टिनामा मेस्सीको आलोचना हुँदै आएको छ । इंग्लिस क्लब म्यानचेस्टर सिटीका फरवार्ड सर्जियो अगुएरोले आफ्नो अर्जेन्टिनी सहयात्री मेस्सीले अर्जेन्टिनाका लागि खेल्दा किन आलोचना भोग्छन भन्ने बुझ्न नसकेको बताएका छन् । मेस्सी सधैं दुःख भोग्ने पीडित व्यक्ति रहेको अगुएरोको दावी छ ।

कीर्तिमानी ६ पटकको बालोन डिओर विजेता मेस्सीले बार्सिलोनाका लागि आफ्नो खेल करियरमा ३४ उपाधि जितेका छन् । जसमा १० स्पेनिस ला लिगा, ८ सुपर कोपा, ६ कोपा डेल रे, चार च्याम्पियन्स लिग, तीन फिफा क्लब वल्डकप र तीन युइएफए सुपर कप समावेश छन् । मेस्सीको नेतृत्वमा अर्जेन्टिना तीनपटक कोपा अमेरिका कपको फाइनलमा पुगे पनि चुकेको छ । मेस्सीले २०१६ को कोपा अमेरिका फाइनलमा महत्त्वपूर्ण पेनाल्टी चुकाएका थिए ।

यस्तै सन् २०१४ को विश्वकपको फाइनलमा पुगेपनि जर्मनीसँग अतिरिक्त समयमा १–० ले पराजित हुँदा विश्वकप जित्ने सपना साकार भएको थिएन । त्यसपछि उनले आवेगमा आउदै अन्तर्राष्ट्रिय फुटबलबाट सन्यासको घोषणा गरेको थियो । पछि पुनः उनी राष्ट्रिय टोलीमा फर्किएका थिए । अर्जेन्टिना २०१८ को विश्वकपको प्रि–क्वाटरफाइनल तथा कोपा अमेरिका २०१९ को सेमिफाइनलबाटै बाहिरिएको थियो ।

यसैले पनि ३२ वर्षीय मेस्सी राष्ट्रिय टोलीका लागि आलोचित छन् । तर, अगुएरोले भने मेस्सीको आलोचना गर्नु बेकार रहेको बताएका छन् ।
‘मलाई लाग्छ मेस्सी पहिलो पीडित व्यक्ति हुन् । जो आफ्नै राष्ट्रमा आलोचित छन्, ‘अगुएरोले भने, ‘उनको आलोचना गर्नेहरू जारी नै छन् । तर, राष्ट्रिय टिममा उनको आलोचना गर्नेहरूलाई मैले बुझ्न सकिरहेको छैन ।’

मेस्सी अझै अर्जेन्टिनालाई आफ्नो पहिलो अन्तर्राष्ट्रिय ट्रफी जिताउन प्रयास गरिरहेका छन् । उनले बिचमा एकपटक संन्यास लिने निर्णय गरेपनि समर्थक र फुटबल संघको निरन्तर दवावका कारण निर्णय फिर्ता लिएका थिए । तर, उनलाई लगातार आफ्ना घरेलु समर्थक र मिडियाबाट आलोचना आउन नछाडेपनि अगुएरोले उनको बचाउ गरेका छन् । यही कारण पनि मेस्सीको प्रदर्शनमा असर परेको अगुएरोको बुझाई छ ।