एजेन्सी – फ्रान्सका प्रधानमन्त्री एडुआर्ड फिलिपेले देशमा सेप्टेम्बरसम्म कुनै खेल गतिविधि नहुने घोषणा गरेसँगै फ्रान्सको लिग फुटबलका सबै खेल रद्द हुने भएको छ ।

प्रधानमन्त्री फिलिपेले राष्ट्रिय सभामा बोल्दै खेलकुदका सम्पूर्ण गतिविधि सेप्टेम्बरसम्म बन्द गर्न निर्देशन दिएका हुन् । उनले बिना समर्थक होस् या अन्य कुनै विकल्प, कुनै हालतमा पनि अहिलेको अवस्थामा खेल गतिवधि संचालन गर्न नसकिने बताएका हुन् ।

‘ खेलकुदका कुनै ठूला गतिविधि अहिले संचालन हुन् । फुटबलको लागि सिजन २०१९-२० अब सुचारु हुने अवस्था छैन,’ उनले भने,’ खेल भन्दापनि अहिलेको अवस्थामा जुन्सुकु खेलकुदमा प्रशिक्षण समेत गर्ने अवस्था छैन ।’

फ्रान्सेली लिगको शीर्ष दुई श्रेणी पनि यससँगै रद्द भएको छ । तर लिगको उपाधि, बढुवा तथा घटुवाबारे भने छिट्टै फ्रान्सको फुटबल संघले निर्णय लिनेछ । यद्यपि सेप्टेम्बरमा पुन: खेल सुचारु भएको अवस्थामा २०२०-२१ सिजन सुरु हुनेछ । संघले अर्को महिना बैठक बस्ने कार्यक्रम रहेको छ । शिर्ष डिभिजन लिग वनमा पीएसजी १२ अंकको अग्रतासहित शीर्षस्थानमा रहेको छ ।

यसअघि नेदरल्यान्ड्सले आफ्नो लिग रद्द गर्दै उपाधि, घटुवा र बढुवा सबै रद्द गरेको थियो । इंग्ल्यान्डमा केहि क्लबहरुले प्रशिक्षण सुरु गर्दा जर्मनीमा मे दोस्रो साताबाट खेल नै सुरु हुने लक्ष्य रहेको छ । इटालीको हकमा भने संघले मे ८ को दिन निर्णय लिने बताइएको छ । यूईएफएले आफ्नो सदस्य राष्ट्रहरुलाई आर्थिक सहयोग गर्ने घोषणा गरिसकेको छ । फिफाले पनि सबै राष्ट्रलाई आर्थिक सहयोग गरेको छ ।